ސޯސަން މަގުގައި ހިނގި އެކްސިޑެންޓްގައި އަނިޔާވި އަންހެންމީހާ ނިޔާވެއްޖެ

މާލޭ ސޯސަންމަގުގައި ދެ ސައިކަލު ޖެހި ހިނގި ނުރައްކާތެރި އެކްސިޑެންޓްގައި އަނިޔާވި މީހުންގެ ތެރެއިން 26 އަހަރުގެ އަންހެންމީހާ މިއަދު ނިޔާވެއްޖެއެވެ.

ފުލުހުންގެ އިދާރާއިން ވިދާޅުވީ، އަންހެންމީހާ ނިޔާވިކަން އާއިލާގެ ފަރާތުން ވަނީ ފުލުހުންނަށް އަންގާފައިވާ ކަމަށެވެ. އެއަންހެންމީހާ ނިޔާވީ، އޭޑީކޭ ހޮސްޕިޓަލުގައި ފަރުވާދެމުން ދަނިކޮށް މިއަދު ހަވީރުގައެވެ.

މި އެކްސިޑެންޓް ހިނގާފައި ވަނީ މިމަހުގެ 21 ވަނަ ދުވަހުގެ، މެންދަމު 01:12 ހާއިރުގައެވެ.

މިއެކްސިޑެންޓް ހިނގީ، ލައިސަންސް ނެތް އުމުރުން 21 އަހަރުގެ ޒުވާނަކު، ދުއްވި ސައިކަލެއް، އެހެން ސައިކަލެއްގައި ޖެހިގެންނެވެ. އެކްސިޑެންޓްވި އަނެއް ސައިކަލުގައި ތިބީ އުމުރުން 22 އަހަރުގެ ފިރިހެނަކާއި އުމުރުން 26 އަހަރުގެ އަންހެނެކެވެ.

މިއެކްސިޑެންޓާއި ގުޅިގެން 21 އަހަރުގެ ފިރިހެންމިހާ ވަނީ ހައްޔަރުކޮށްފައެވެ.

ފުލުހުން ދަނީ މިއެކްސިޑެންޓްގެ މައްސަލަ ތަޙްޤީޤުކުރަމުންނެވެ.