ލ.ހިތަދޫ ވޯޓާ ޕާރކުގެ މަސައްކަތް ނިންމައި ރަސްމީކޮށް ހުޅުވައިފި

ލ.ހިތަދޫ ވޯޓާ ޕާރކުގެ މަސައްކަތް ނިންމައި ރަސްމީކޮށް ހުޅުވައިފިއެވެ.

މިމަޝްރޫޢަކީ، ލ ހިތަދޫ ކައުންސިލުން ކުރިޔަށް ގެންދިޔަ މަޝްރޫޢެކެވެ. މިއަދުން ފެށިގެން މިޕާކް އާއްމުރައްޔިތުންނަށް ބޭނުން ކުރެވޭނެކަމަށް ވެސް ކައުންސިލުން ވަނީ ވިދާޅުވެފައެވެ.

ހިތަދޫ ކައުންސިލުން ވިދާޅުވީ ކުރިއަށް އޮތް 15 ދުވަހުގެ ނިޔަލަށް މި ވޯޓާ ޕާރކް ބޭނުންކުރެވޭނެ ކަމަށާއި މިމުއްދަތުގެ ތެރޭގައި ކޮންމެ ދުވަހަކުވެސް ހަވީރު 16:00 އިން 18:00 އަށް އާންމުންނަށް މި ސަރަހައްދު ބޭނުންކުރުމުގެ ފުރުސަތު އޮންނާނެކަމަށެވެ.

މި ވޯޓާ ޕާކުގެ ބުކިންގ އަދި ގަޑިތަކާއި ބެހޭ މަޢުލޫމާތު އެރަށުގެ ކައުންސިލް އިދާރާގެެ ފޭސްބުކް ޕޭޖް އިން ލިބެން ހުންނާނެ ކަމަށްވެސް ކައުންސިލުން ވަނީ ވިދާޅުވެފައެވެ. ޕްލޭ ސެޓް ބޭނުންކުރާ ފަރާތްތަކުގެ ރައްކާތެރިކަމަށްޓަކައި ކައުންސިލުން ވަނީ ހާއްސަ އުސޫލުތަކެއް ކަނޑައަޅާފައެވެ.

އެގޮތުން، ޕާކަށްދާ ކުދިންނަކީ ފަތަން އެނގޭ ކުދިންކަން ކަށަވަރުކުރުމަށާއި، ފަތަން ނޭނގޭ ކުދިން ލައިފް ޖެކެޓް ނުވަތަ އާމް ރިންގް ބޭނުންކުރުމަށް ވަނީ އިލްތިމާސްކޮށްފައެވެ. އަދި މީގެއިތިރުން ކޮންމެ ކުއްޖަކުވެސް ދާންވާނީ ބެލެނި ވެރިޔަކާ އެކުގައިކަމަށް ވެސްވަނީ ބުނެފައެވެ .

ހަމަ އެއާއެކު ޕާކް ބޭނުންކުރުމުގައި ޙާއްސަ ސަމާލުކަން ދޭން ޖެހޭ ކަންކަން ވެސް ކައުންސިލުން ވަނީ އާއްމުކޮށްފައެވެ. މިގޮތުން ކެވެލި ،އަނގޮޓި، ބެލްޓް ،ޖިންސް، ޕިން ފަދަ ޕާކަށް ގެއްލުމެއް ލިބިދާނެފަދަ އެއްވެސް އެއްޗެއް ބޭނުން ކުރުމަކީ މަނާކަމެކެވެ.

ޚަބަރު ލިޔުނީ: އަޙްމަދު ޝިޔާން - ރަށުރިޕޯޓަރ