"ބޮގޯޓާ ކޯލް ޓު އެކްޝަން" ޤަރާރުގައި ދިވެހިރާއްޖެއިން ސޮއިކޮށްފި

"ބޮގޯޓާ ކޯލް ޓު އެކްޝަން" ޤަރާރުގައި ދިވެހިރާއްޖެއިން މިއަދު ސޮއިކޮށްފިއެވެ.

ދިވެހިރާއްޖެގެ ފަރާތުން "ބޮގޯޓާ ކޯލް ޓު އެކްޝަން" ގައި ސޮއި ކުރައްވާފައިވަނީ މިނިސްޓަރ އޮފް ހެލްތް، ފެމިލީ އެންޑް ވެލްފެއަރ ޤީލާ ޢަލީ އެވެ.

މި ޤަރާރަކީ، ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި، ކުޑަކުދިންގެ ޙައްޤުތައް ރައްކާތެރިކުރުމުގެ ނިޒާމު ވަރުގަދަކޮށް، ކުޑަކުދިންނަށް އަނިޔާ ކޮށްގެން ހުށަހަޅާ މައްސަލަތަކަށް އިޖާބަދިނުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތަކާއި އަދި ގައުމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާކުރުމުގެ މަޤުސަދުގައި އެކުލަވާލާފައިވާ ޤަރާރެކެވެ.

މިޤަރާރު ފާސްކުރީ، 2024 ވަނަ އަހަރުގެ ނޮވެންބަރު މަހު ކޮލަމްބިއާގެ ބޮގޮޓާގައި ބޭއްވި، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަޤުވާމީ މަހާސިންތާގައެެވެ. މި ޤަރާރުގެ މައިގަނޑު މަޤްސަދަކީ ކުޑަކުދިންނަށް ކުރާ އަނިޔާ ހުއްޓުވުމަށާއި އެފަދަ ކަންކަމާ ގުޅިގެން ފިޔަވަޅު އެޅުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތައް ހަރުދަނާކޮށް، ކުޑަކުދިން ރައްކާތެރިކުރުމުގެ ނިޒާމު އިތުރަށް ވަރުގަދަކުރުމެވެ.

ބޮގޯޓާ ކޯލް ޓު އެކްޝަންގައި ހިމެނޭ ކަންކަމަކީ، ކުޑަކުދިންނަށް ކުރާ އަނިޔާ ހުއްޓުވުމަށާއި އެފަދަ ކަންކަމަށް އިޖާބަދިނުމަށް ދިވެހިރާއްޖެއިން 2024 ވަނަ އަހަރު އެކުލަވާލި 'ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިންގ ޓު ވަޔަލެންސް އަގެއިންސްޓް ޗިލްޑްރަން' އާ ގުޅިލާމެހިފައިވާ ކަންކަމެވެ. ރާއްޖެއިން އެކުލަވާލި މި ޕްލޭންގެ މައިގަނޑު އަމާޒަކީ އަނިޔާއިން ރައްކާތެރިވުމަށް އިސްކަންދީގެން، ގޭތެރެއާއި، ތައުލީމުދޭ މަރުކަޒުތަކާއި، މުޖުތަމަޢުގެ ތެރޭގައާއި އަދި އިންޓަނެޓްގެ ވަސީލަތްތައް ބޭނުންކުރުމުގައި ވެސް ކުޑަކުދިންނަށް އަމާން އަދި ރައްކާތެރިކަން ލިބޭނެ މާޙައުލެއް ކަށަވަރުކޮށްދިނުމެވެ.

ބޮގޯޓާ ކޯލް ޓު އެކްޝަންގައި ދިވެހިރާއްޖެއިން ބައިވެރިވުމަކީ، ކުޑަކުދިންނަށް ކުރާ އަނިޔާ ހުއްޓުވުމަށް ގައުމީ ފެންވަރުގައި ކުރަމުންދާ މަސައްކަތްތައް އިތުރަށް ހަލުއިވެ، ދުނިޔޭގެ ފެންވަރުގައި ކުރެވޭ މިފަދަ މަސައްކަތްތަކުގައި ރާއްޖޭގެ ދައުރު އިތުރަށް ފުޅާވެގެންދާނެ ކަމެއް ކަމުގައި މިނިސްޓްރީ އޮފް ހެލްތު އިން ވަނީ ވިދާޅުވެފައެވެ.