ތިން ޖީލުގެ މީހުން އެކުގައި ހިނގާލުމުގެ ހަރަކާތް މިއަހަރު ހަނިމާދޫގައި ބާއްވަނީ

ޕެންޝަން އޮފީހުން ސިލްސިލާކޮށް ބާއްވަމުންދާ "ތްރީ ޖެނެރޭޝަން ވޯކް" (3ޖެންވޯކް) މިއަހަރު ހަނިމާދޫގައި ބޭއްވުމަށް ހަމަޖައްސަފިއެވެ.

ޕެންޝަން އޮފީހުން ހާމަކޮށްފައިވާ ގޮތުގައި، މިއަހަރުގެ ހިނގާލުން ބޭއްވުމަށް ހަމަޖައްސާފައި ވަނީ، 17 އޮކްޓޫބަރު 2026 ވާ ހޮނިހިރު ދުވަހުގައެވެ. މިއީ ޕެންޝަން އޮފީހުން މި ހިނގާލުން ބާއްވާ 4 ވަނަ ފަހަރެވެ.

މިއީ ކުޑަކުދިންނާއި ބޮޑެތިމީހުން އަދި ދޮށީއުމުރުގެ މީހުން ހިމެނޭހެން، މުޅި އާއިލާއަށް ޚާއްޞަކޮށްގެން ބާއްވާ ހިނގާލުމެކެވެ. މި ހަރަކާތަކީ ދުޅަހެޔޮކަމާއި މާލީ ރައްކާތެރިކަން އިތުރުކުރުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުން އަދި ރިޓަޔަރމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފައްދައި، ރަނގަޅު މާލީ އާދަތަކަށް ބާރުއެޅުމުގެ ގޮތުން އަހަރަކު އެއްފަހަރު މި އޮފީހުން ކުރިއަށްގެންދާ ސިލްސިލާ ހަރަކާތެއް ކަމުގައި އެ އޮފީހުން ހާމަކުރައްވާފައި ވެއެވެ.

މި ހިނގާލުމަށްފަހު، ހުރިހާ އުމުރުފުރައެއްގެ ބައިވެރިންނަށްވެސް ބައިވެރިވެވޭގޮތަށް ކުރިޔަށް ގެންދާ އާއިލީ ހަވީރެއްވެސް އޮންނާނެ ކަމުގައި، ޕެންޝަން އޮފީހުން ހާމަކުރައްވާފައި ވެއެވެ.

"3ޖެން ވޯކް" ގެ މައިގަނޑު މަޤްޞަދަކީ އާއިލާގައި ހިމެނޭ އެކި ޖީލުތަކުގެ މީހުންގެ މެދުގައި އޮންނަ ގުޅުންތައް އިތުރަށް ބަދަހިކޮށް، އުފާވެރި މާޙައުލެއްގައި އާއިލާތަކަށް އެކުގައި އަގުހުރި ވަގުތުތަކެއް ހޭދަކުރުމުގެ ފުރުޞަތު ތަނަވަސްކޮށްދިނުން ކަމުގައި ޕެންޝަން އޮފީހުން ވަނީ ހާމަކުރައްވާފައެވެ.