ހާޖަރާގޭ ތައުފީޤުގެ އަޑު ދިވެހި ޖީޕީޓީން ބޭނުން ނުކުރެވޭ ގޮތް ހަދައިފި

ދިވެހި ޖީޕީޓީ ބޭނުންކުރަމުންދާ ސީރަތު އަޑު ބޭނުން ކުރަމުން ދިޔުމާއިއެކު އާއިލާއިން ކަންބޮޑުވުން ފާޅުކޮށްފައިވާތީ، އެއަޑު ދިވެހިޖީޕީޓީގައި ބޭނުން ނުކުރެވޭ ގޮތް ހަދައިފިއެވެ.

ދިވެހިޖީޕީޓީގެ ބެލެނިވެރި ކުންފުނި، ޖަވާބު ޕްރައިވެޓް ލިމިޓެޑުން ނެރުނު ބަޔާނުގައި ބުނެފައި ވަނީ، ދިވެހި ޖީޕީޓީގެ ލިޔުމުން އަޑަށް ބަދަލުކުރެވޭ ޚިދުމަތުގައި، ހިމަނާފައިވާ ސީރަތު އަޑު އެޕްލެޓްފޯމުން ނެގުމަށް ނިންމާފައިވާ ކަމަށެވެ. ސީރަތު އަޑަކީ، ދިވެހިރާއްޖޭގެ އަޑުން ގެނެސްދޭ ކީރިތިރަސޫލާގެ ސިޔަރަތު ވިދާޅުވެފައިވާ އަލްމަރްހޫމް ޙާޖަރާގޭ މުޙައްމަދު ތަޢުފީޤުގެ އަޑު އަސްލަކަށް ބަލައިގެން އުފައްދާފައިވާ އަޑެކެެވެ.

ޖަވާބު އެކަޑަމީން ބުނީ، އެއަޑު ނެގުމަށް ނިންމީ، އެ އަޑު ދިވެހި ޖީޕީޓީއަށް ގެނައުމަށްޓަކައި ހަމަޖައްސަންޖެހޭ ރަސްމީ ލައިސަންސްތައް ހޯދައި، އަޑު ނަމަހަ ގޮތުގައި ބޭނުން ކުރުން ހުއްޓުވުމަށް ސަލާމަތީ ފިޔަވަޅުތަކެއް އަޅާފައި ވީކަމުގައި ވިޔަސް، އެ ޚިދުމަތާއި ގުޅިގެން އާއިލާގެ ކަންބޮޑުވުންތަކެއް ހުރިކަމަށް ފާހަގަކުރެވިފައިވާތީ ކަމަށެވެ.

ޖަވާބު ޕްރައިވެޓް ލިމިޓެޑުންވަނީ، ހާޖަރާގޭ ތަޢުފީޤުގެ އާއިލާގެ ކިބައިން މަޢާފަށްވެސް އެދިފައެވެ.