ފްލައި ދުބާއީ ބޯޓު ވައްޓާލަން އުޅުނު މައްސަލައާ ގުޅުވައި ދިވެހި ދެ ޕައިލެޓުންނާއި ސުވާލުކޮށްފި

ތެލްއަވީވަށް ދަތުރުކުރި ފްލައި ދުބާއީގެ ބޯޓު ވައްޓާލުމަށް، އެބޯޓުގެ ކޯ ޕައިލެޓް މަސައްކަތްކުރި ކަމަށް ކުރެވޭ ތުހުމަތާއި ގުޅުވައި، އެ އެއާލައިންގައި މަސައްކަތް ކުރާ، ދިވެހި ދެ ކޯޕައިލެޓަކާއި ސުވާލުކޮށްފިއެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި، އެމައްސަލައިހައި އެ ދެ ޕައިލެޓުން ވަނީ ހައްޔަރުކޮށްފައެވެ. އެހެން ނަަމަވެސް ދިވެހި ދެޕައިލެޓުން ހައްޔަރުކޮށްފައި ނުވާކަމުގައި ސަރުކާރުގެ ބައެއް އިސް އޮފިޝަލުން ވަނީ ވިދާޅުވެއެވެ.

ސުވާލުކުރި ދިވެހި ދެޕައިލެޓުންނަކީ، ފްލައި ދުބާއީގެ ބޯޓު ވައްޓާލަން މަސައްކަތް ކުރިކަމަށް ތުހުމަތު ކުރެވުނު އެބޯޓުގެ ކޯޕައިލެޓް، އުމާންގެ ހައްމާމް އަލް ހަމާނީއާ އެއް އިމާރާތެއްގައި ދިރިއުޅެމުން އަންނަ ދެ ޕައިލެޓުންކަމަށް ރިޕޯޓްތައް ބުނެފައި ވެއެވެ. އެކަމަކު އެދެމީހުންނާއި މި މައްސަލަ ގުޅެނީ ކިހިނެއް ކަމެއް އަދި ހާމަކޮށްފައެއް ނުވެއެވެ. މީޑިއާ ރިޕޯޓްތައް ބުނާ ގޮތުގައި ދިވެހި ދެޕައިލެޓުން ހައްޔަރުކޮށްފައި ވަނީ އެ މައްސަލަ އާއި ގުޅިގެން ސުވާލު ކުރުމަށެވެ.

ޔޫއޭއިން މިއަދު ބުނެފައި ވަނީ، ފްލައި ދުބާއީގެ ކޯ-ޕައިލެޓް ހައްމާމް އަލް ހައްމާމީ މަސައްކަތްކޮށްފައި ވަނީ، ފްލައިޓް ހައިޖެކްކޮށް، އިޒްރޭލުގެ ތެރެއަށް ވައްޓާލަން ކަމުގައި ތުހުމަތު ކުރެވޭ ކަމަށެވެ. އަދި ބޯޓުގެ ޕައިލެޓަށް އޭނާ ހަމަލާދީފައި ވަނީ، ބޯޓު ވެއްޓިއްޖެ ހާލަތުގައި، ކޮކްޕިޓްގެ ވިންޑް ސްކްރީން ތަޅާލުމަށް ބޭނުން ކުރުމަށް ކޮކްޕިޓްގައި ބަހައްޓާފައި ހުންނަ، "ކްރޭޝް ހެމާ" އަކުން ކަމުގައިވެސް ވަނީ ހާމަކޮށްފައެވެ.

ހާދިސާގެ ފުރަތަމަ ވަގުތުން ފެށިގެން އިޒްރާއީލުން ވަނީ، އެއީ ޓެރަރިސްޓް ހަމަލާއެއް ކަމުގައި ބުނެފައެވެ. ފްލައި ދުބާއީގެ އެބޯޓުގައި 187 އިޒްރޭލުގެ ރައްޔިތުން ތިއްބެވެ.

ބޯޓުގެ ތެރޭގައި ހިނގައި ދިޔަ ހަމަނުޖެހުންތަކަށް ފަހުގައި، ބޯޓު ޖައްސާފައި ވަނީ، ސަޢޫދީ ޢަރަބިއްޔާގެ ތަބޫކު އެއާޕޯޓަށެވެ.