ބާމިއުޑާ މަތިން ދަތުރުކުރި އެއާ އެމްބިއުލާންސެއް ގެއްލިއްޖެ

އެމެރިކާގެ ބަމިއުޑާއިން ބަލިމީހަކު ގޮވައިގެން ބޮސްޓަންއަށް ދަތުރު ކުރި އެއާއެމްބިއުލާންސް މަތިންދާ ބޯޓެއް ގެއްލިއްޖެއެވެ.

ގެއްލުނު މަތިންދާ ބޯޓަކީ، ގަލްފްސްޓްރީމް ޖީ100 ޖެޓެއް ކަމަށާއި، ބޯޓާއި މުވާސަލާތީ ގުޅުންތައް ކެނޑުނު އިރު ބޯޓު ދަތުރުކުރަމުން ދިޔައީ، ބާމިއުޑާ އާއި ބޮސްޓަން އާއި ދެމެދުން ކަނޑުގެ ސަރަހައްދުގައިކަމަށް އެމެރިކާގެ ކޯސްޓު ގާޑުން ވަނީ ބުނެފައެވެ. މި ބޯޓު ވެއްޓިފައިވާ ކަމަށް ބެލެވޭއިރު، އެމެރިކާގެ ކޯސްޓް ގާޑުން އަންނަނީ، ބޯޓު ހޯދުމުގެ މަސައްކަތް ކުރަމުންނެވެ.

ބޯޓު ގެއްލުނު އިރު އޭގައި ތިބީ ޖުމުލަ 6 މީހުންނެވެ. އޭގެ ތެރޭގައި ހިމެނެނީ، ކެނެޑާއަށް ނިސްބަތްވާ ދެ ޕައިލެޓުންނާއި، ކެނެޑާއަށް ނިސްބަތްވާ ދެ މެޑިކަލް ސްޓާފުންނާއި ބަލި މީހާގެ އިތުރުން ބަލިމީހާގެ އެހީތެރިޔާ ހިމެނެއެވެ.

މިބޯޓަކީ، ބާމިއުޑާގެ އެލްއެފް ވާޑޭ އިންޓަރނޭޝަނަލް އެއާޕޯޓުން ރޭގަނޑު 23:40ގައި ފުރި ބޯޓެކެވެ. ބޯޓާއި ގުޅުން ކެނޑުނީ، އެމެރިކާގެ ގަޑިން މެންދަމު 1:00 ހާއިރުގައި ކަމަށް ރިޕޯޓްކޮށްފައި ވެއެވެ.