ތިން މިނިސްޓްރީ އަނދައިގެން ދިޔައީ ކަރަންޓް ޝޯޓްވެގެން - ފުލުހުން

މީގެ ދޮޅު އަހަރަށް ވުރެ ގިނަ ދުވަސްކުރިން، ސަރުކާރުގެ ތިން މިނިސްޓްރީއެއް އަނދައިގެން ދިޔައީ ކަރަންޓް ޝޯޓްވެ ސީލިންގ ތެރޭގައި ރޯވެގެންކަމުގައި ފުލުހުންގެ އިދާރާއިން ވިދާޅުވެއްޖެއެވެ.

އަލިފާނުގެ އެހާދިސާ އާއި ބެހޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި، ފުލުހުންގެ ސުޕްރިންޓެންޑެންޓް އަބްދުﷲ ރަޝީދު ވިދާޅުވީ، އަލިފާނުގެ ހާދިސާއާ ގުޅޭ ގޮތުން ފުލުހުން ކުރި ތަޙްޤީޤަށް ސާބިތުވެފައި ވަނީ، އަލިފާން ރޯވީ ކަރަންޓްޝޯޓުވުމުގެ ސަބަބުންކަމަށެވެ. އަދި އެންމެ ފުރަތަމަ ދުން އަރަމުން ދިޔައިރު، ގްރީން ބިލްޑިންގ އާއި ހައުސިންގ މިނިސްޓްރީގެ އިމާރާތުގެ ސީލިންގ ތެރޭގައި އެކި ތަންތަނުގައި ވަޔަރުތަކުގައި ރޯވެފައި ހުއްޓައި ފެނުނު ކަމަށާއި، މުވައްޒަފުން ނެރެ ތަން ހުސްކުރީ، އެހެންވެކަމަށް އޭނާ ވިދާޅުވިއެވެ.

ފުލުހުން ބުނެފައި ވަނީ އެންމެ ފުރަތަމަ އަލިފާން ރޯވެފައި ވަނީ އިންފްރާސްޓްރަކްޗަރ މިނިސްޓްރީ ހިންގަމުން އައި ބައިގައި ކަމަށެވެ.

އެދެ އިމާރާތުގައި ރޯވެ އަނދާފައި ވަނީ 2024 ވަނަ އަހަރުގެ ޑިސެމްބަރު މަހުގެ 12 ވަނަ ދުވަހުގެ ހެނދުނުގައެވެ.

އަލިފާނުގެ މިހާދިސާގެ ތަޙްޤީޤު އަދިވެސް މުޅިން ނުނިމޭކަމުގައި ފުލުހުންގެ އިދާރާއިން ވަނީ ވިދާޅުވެފައެވެ. މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ، އަލިފާނުގެ ހާދިސާގެ ބައެއް ސީސީޓީޥީ ފުޓޭޖްވެސް ދައްކާފައެވެ.