ފެންބޮޑުވެ އިނގުރައިދޫގެ 15 ގެއަކަށް ގެއްލުން ލިބިއްޖެ

ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ އަތޮޅުތަކަށް ބޯކޮށް ވާރޭވެހި، ބައެއް ރަށްރަށުގައި ފެންބޮޑުވެފައިވާ ކަމަށާއި، މިގޮތުން، ރ. އިނގުރައިދޫގައި ފެންބޮޑުވެ، 15 ވަރަކަށް ގެއަށް އެކިވަރުގެ ގެއްލުންތައް ލިބިފައިވާކަމުގައި، ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވެއްޖެއެވެ.

އެ އޮތޯރިޓީން ވިދާޅުވީ، އިއްޔެ ބޯކޮށް ވާރޭވެހުމުގެ ސަބަބުން، އިނގުރައިދޫގެ 30އަށް ވުރެ ގިނަ ގެއަށް ފެން ވަތްކަމަށް އެރަށުން ރިޕޯޓްކޮށްފައިވާ ކަމަށެވެ. ގޭގެއަށް ފެންވަނުން ހުއްޓުވުމަށްޓަކައި ވެލިބަސްތާ ޖެހުމާއި، ފެންހިއްކުމުގެ މަސައްކަތް ކައުންސިލާއި ރަށުގެ މުއައްސަސާތައް އަދި ރައްޔިތުން ގުޅިގެން މިހާރުވެސް ދަނީ ކުރަމުންކަމުގައިވެސް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވިއެވެ. މީގެއިތުރުން، ފެންބޮޑުވުމާ ގުޅިގެން ކަރަންޓުގެ ޚިދުމަތް މެދުކެނޑުނު ސަރަޙައްދުތަކަށް އަލުން ކަރަންޓު ދިނުމުގެ މަސައްކަތްވެސް ދަނީ ކުރަމުން ކަމުގައި ޑިޒާސްޓަރ މެނޭޖްމެންޓް އޮތޯރިޓީން ވިދާޅުވިއެެވެ.

އިއްޔެ ބޯކޮށް ވާރޭވެހި، އުތުރުގެ ރަށްތަކުގެ ތެރެއިން ރ. ރަސްމާދޫ، ރ. އިނގުރައިދޫ އަދި ޅ. ނައިފަރުގައިވެސް ފެންބޮޑުވެފައިވާކަން ރިޕޯޓްކޮށްފައިވާ ކަމުގައި، ޑިޒާސްޓަރ މެނޭޖްމެންޓް އޮތޯރިޓީން ވަނީ ވިދާޅުވެފައެވެ.