ގާތަކުގެ ތެރެއަށް މީހާ ވެއްޓި ތާށިވެފައި އޮތީ ބޯކޮޅު ވަތަށް: އެމްއެންޑީއެފް

މިއަދު މެންދުރު ފަހު މާލޭ ދެކުނު ފަރާތު އުސްފަސްގަނޑާއި ދިމާއިން، ގާތަކުގެ ތެރެއަށް ވެއްޓުނުމީހާ ވެއްޓިތާށިވެފައި އޮތީ ބޯކޮޅު ވަތަށް ކަމުގައި އެމްއެންޑީއެފުން ވިދާޅުވެއްޖެއެވެ.

އާއްމުވެފައިވާ ވީޑިއޯތަކުން ފެންނަ ގޮތުގައި ގާތަކުގެ ތެރެއިން ފެންނަން އޮތީވެސް އެމީހާގެ ފައިއެކަންޏެވެ. އެމްއެންޑީއެފުން ވިދާޅުވީ، ބޯކޮޅުވަތަށް އެމީހާ ވެއްޓިފައި އޮތީ، ތޮށީގެ ހިލަތަކާއި ބަޖިޔާގާތަކުގެ ތެރޭގައި އަޑީގައި ހެދިފައި އޮތް ހުސްޖާގައަކަށް ކަމަށެވެ. އަދި އެމީހާ ސަލާމަތްކުރަން ޖެހުނީ، ސަލާމަތީ އާލާތްތައް ބޭނުންކޮށްގެން ބައެއް ހިލަތައް ނަގައި ދުރަށްޖެއްސުމަށްފަހުގައި ކަމުގައިވެސް އެމްއެންޑީއެފުން ވިދާޅުވިއެވެ.

އަދި އެމީހާ ހޮސްޕިޓަލަށް ގެންގޮސްފައި ވާއިރު، އޭނާގެ ހާލު ރަނގަޅު ކަމުގައިވެސް އެމްއެންޑީއެފުން ވިދާޅުވިއެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް މިހާދިސާގައި މައުލޫމާތު ލިބިފައި ވަނީ، މިއަދު ހަވީރު 17:24 ހާއިރު ކަމުގައި އެމްއެންޑީއެފުން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މިހާދިސާގައި ގާތަކުގެ ތެރެއަށް ވެއްޓި ތާށިވި މީހާއަކީ، އުމުރުން 50 އަހަރުގެ ދިވެހި ފިރިހެނެއްކަމަށެވެ. އެމީހާ ގާތަކުގެ ތެރެއަށ ްވެއްޓުނީ ކީއްވެކަމެއް މިހާތަނަށް އެނގިފައެއް ނުވެއެވެ.