ބާޖެއް ޖެހި ހުޅުމާލެ ލަކުޑި ޖެޓީގެ އުތުރު ފާލަން ހަލާކުވެއްޖެ

ހުޅުމާލޭގެ ލަކުޑި ޖެޓީގެ އިތުރު ފަރާތު ޖެޓީގައި ބާޖަކުން ޖެހި ހަލާކުވެއްޖެއެވެ.

މިހާދިސާ އާއި ގުޅިގެން އެ ޖެޓީއަށް ބޮޑެތި ގެއްލުންތަކެއް ލިބިފައިވާތީ، އެޗްޑީސީން މިހާރު ވަނީ އެޖެޓީއަށް އުޅަނދު ފަހަރު ގާތް ކުރުމާއި، އެޖެޓީމައްޗަށް އެރުން މަނާކޮށްފައެވެ. އެޗްޑީސީން ބުނެފައި ވަނީ ޖެޓީއަށް ލިބިފައިވާ ގެއްލުންތަކާއި ގުޅިގެން އެޖެޓީއަށް އަރައިފޭބުމަކީ، ރައްކާތެރިކަމެއް ނޫން ކަމަށެވެ.

އެޗްޑީސީން ވިދާޅުވީ، އެޖެޓީގެ ސަލާމަތީ ރައްކާތެރިކަމާއި ގުޅޭ އެސެސްމެންޓް ހަދައި އަލުން މަރާމާތުކޮށް ހުޅުވައިލެވެންދެން އެތަން ބޭނުން ކުރުން ވަގުތީ ގޮތުން މަނާކޮށްފައި ވާކަމަށެވެ. އަދި އެކަމުގެ ސަބަބުން ދިމާވެދާނެ ދަތިތަކަށް މަޢާފަށް އެދޭ ކަމުގައިވެސް އެޗްޑީސީން ވަނީ ބުނެފައެވެ.

ހުޅުމާލެއަށް ގާތްކުރާ ފެރީ ލޯންޗުތަކާއި ސަފާރީތަކަށް މީހުން އަރައިފޭބުމަށް އާއްމުގޮތެއްގައި ބޭނުން ކުރަނީ، ލަކުޑިޖެޓީގެ ދެ ފާލަމެވެ. މީގެ ތެރެއިން ދެކުނު ފާލަން މިހާރުވެސް ބޭނުން ކުރުމަށް އޮތީ ހުޅުވާލާފައެވެ.