ނޫނު އަދި ޅަވިޔަނި އަތޮޅުގެ ފައިނަލް މިރޭ

އެފްއޭއެމް ފުޓްސަލް އެޓޯލް ޗެންޕިއަންޝިޕްގެ ނޫނު އަދި ޅަވިޔަނި އަތޮޅު ފައިނަލް މިރޭ އޮންނާނެއެވެ.

ނޫނު އަތޮޅުން ހަތަރު ޓީމު ވާދަކުރިއިރު، މަނަދޫ ޓީމުން ދެމޮޅާއި އެކު މަގޫދޫ މެޗުން ބަލިވެ 6 ޕޮއިންޓާއި ފައިދާ 2 ގޯލާއިއެކީ ޓޭބަލްގެ 1 ވަނަ ޓީމުގެ ގޮތުގައި ފައިނަލްގެ ޖާގަހޯދިއިރު، މާފަރު އަތުން ބަލިވި ނަމަވެސް މަގޫދޫއިން 2 ވަނަ ޖާގަކަށަވަރުކުރީ 6 ޕޮއިންޓާއިއެކުގައެވެ.

މާފަރު ޓީމުން މުބާރާތާއި ވަކިވީ 4 ޕޮއިންޓާއި އެކު އަދި ޅޮހީ ޓީމުން މުބާރާތުން ވަކިވާން ޖެހުނީ، އެއްވެސް މޮޅެއް ނުލިބި 1 ޕޮއިންޓާއިއެކުގައެވެ.

ނޫނު އަތޮޅު ފައިނަލް މެޗު މަނަދޫގައި މިރޭ ކުޅޭއިރު، ޅ އަތޮޅުގެ ފައިނަލް މެޗް މިރޭ ހިންނަވަރުގައި ކުޅޭނެެއެވެ. ޅ. އަތޮޅުން ނައިފަރު އަދި ހިންނަވަރު ވެސް ވަނީ ޒޯން ބުރަށް ކޮލިފައިވެފައެވެ. ޅ އަތޮޅުން ބައިވެެރިވެފައި ވަނީ ވެސް މިދެޓީމެވެ.

ރ އަތޮޅު ޗެންޕިއަނުންގެ ގޮތުގައި ދުވާފަރު އަދި ރަނަރއަޕް އިނގުރައިދޫ، ބ އަތޮޅުގެ ޗެންޕިއަން އޭދަފުށި އަދި ރަނަރއަޕް ތުޅާދޫ، ނ އަދި ޅ އިން މަނަދޫ މަގޫދޫ ނައިފަރު އަދި ހިންނަވަރަށް ވެސް މިވަނީ ޒޯން ބުރުގެ ޖާގަލިބިފައެވެ. ޒޯން ބުރުގައި ޓީމުތައް ވާދަކުރަންޖެހޭ ޓީމުތައް ކަށަވަރުވާނީ މިރޭގެ މެޗުތަކަށް ފަހުއެވެ.