ސޯސަންމަގުގައި ހިނގި އެކްސިޑެންޓާއި ގުޅިގެން މީހަކު ހައްޔަރުކޮށްފި

މާލޭ ސޯސަން މަގުގައި، ހޯމަ ދުވަހުގެރޭ ދަންވަރު ހިނގި އެކްސިޑެންޓާއި ގުޅިގެން އުމުުރުން 21 އަހަރުގެ ދިވެހި ފިރިހެނަކު ހައްޔަރުކޮށްފައިވާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ކޯޓު އަމުރެއްގެ ދަށުން ހައްޔަރުކޮށްފައި ވަނީ، އެކްސިޑެންޓްވި ދެ ސައިކަލުގެ ތެރެއިން އެއްސައިކަލު ދުއްވި ލައިސަންސް ނެތް މީހާ ކަމަށެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައި ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ދެ ސައިކަލުޖެހި ހިނގި އެ އެކްސިޑެންޓްގައި ތިން މީހުންނަށް އަނިޔާވިއެވެ. ހައްޔަރުކުރި މީހާއަށްވެސް އަނިޔާވި އިރު، އޭނާ ހައްޔަރުކޮށްފައި ވަނީ ފަރުވާއަށް ފަހުގައި ހޮސްޕިޓަލުން ދޫކޮށްލުމުން ކަމުގައި އެނގިފައި ވެއެވެ.