ކުރީގެ ނައިބު ރައީސް ފައިސަލް އެމްޑީޕީގެ ޕްރައިމަރީގައި ވާދަކުރައްވަން ނިންމަވައިފި

އައު ޤާނޫނުގެ އަސާސީގެ ދަށުން ދައުރެއް ފުރިހަމަކުރެއްވި، ފުރަތަމަ ރައީސުލްޖުމްހޫރިއްޔާގެ ނައިބު ފައިސަލް ނަސީމް، އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ނިންމަވައިފިއެވެ.

ފައިސަލް ނަސީމް ރިޔާސީ ޕްރައިމަރީގައި ވާދަކުރައްވާކަން ރަސްމީގޮތުން އިޢުލާނުކުރައްވާފައި ނުވިނަމަވެސް، ރިޔާސީ ޕްރައިމަރީގައި ފައިސަލް ވާދަކުރައްވާކަން އިތުބާރުހުރި މަސްދަރުތަކުން ވަނީ ކަށަވަރުކުރެވިފައެވެ. އަދި އެނިންމެވުމާއި ގުޅޭގޮތުން ފައިސަލް ނަސީމްވެސް ރަސްމީ ސިފައެއްގައި އަދި މީޑިއާއަށް މައުލޫމާތު ޙިއްސާކުރައްވާފައެއް ނުވެއެވެ. އެހެން ނަމަވެސް ރިޔާސީ ޕްރައިމަރީގައި ފައިސަލް ނަސީމް ވާދަކުރައްވާނެކަން ރަސްމީގޮތުން ވަރަށް އަވަކަށް އިޢުލާނު ކުރައްވާނެ ކަމުގައި ފައިސަލް ނަސީމްގެ އަރިސް ބޭބޭފުޅުންގެ ފަރާތުން މައުލޫމާތު ލިބިފައިވެއެވެ.

މައުލޫމާތު ލިބޭ ގޮތުގައި، ރިޔާސީ ޕްރައިމަރީގައި ފައިސަލް ނަސީމް ވާދަކުރާއިރު، އެމަނިކުފާނުގެ ނައިބެއްގެ ގޮތުގައި ހުންނަވާނީ، މާލޭ ސިޓީގެ މޭޔަރު އާދަމް އާޒިމެވެ. އަދި ކުރީގެ ރައީސް އިބްރާހީމް މުޙައްމަދު ޞާލިޙް ފައިސަލްއަށް ތާއީދުކުރައްވާކަމުގެ ޚަބަރުތަކެއް ފެތުރިފައި ވީނަމަވެސް، ރައީސް އިބްރާހީމް މުޙައްމަދު ޞާލިޙްގެ ފަރާތްޕުޅުން ރަސްމީކޮށް އެފަދަ ނިންމުމެއް ނިންމާފައިވާކަން ހާމަކުރައްވާފައެއް ނުވެއެވެ.

ފައިސަލް ނަސީމް އެމްޑީޕީއަށް ސޮއިކުރައްވާފައި ވަނީ، އެމްޑީޕީގެ ވެރިކަން ނިމުމަށްފަހުގައެވެ.

އިޖުތިމާޢީ ޚިދުމަތްތެރިކަމުގެ ރޮނގުން އާއްމުރައްޔިތުންގެ ގިނަ ބައެއްގެ ތާޢީދުހޯއްދަވާފައިވާ ފައިސަލް ނަސީމަކީ، 2028ގެ ރިޔާސީ އިންތިޚާބުގައި، ވާދަކުރެއްވުމަށް އެންމެ އެކަށީގެންވާ ކެންޑިޑޭޓު ކަމުގައި އެމަނިކުފާނަށް ތާއީދުކުރާ ފަރާތްތަކުން، ސޯޝަލް މީޑިއާގައި އަންނަނީ ފާހަގަކުރަމުންނެވެ.