ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން ނިންމި ނިންމުން ދެމަސް ނުވަނީސް ބަދަލުކުރަން ނިންމައިފި

ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން ޤާނޫނަށް އިސްލާޙު ގެނައިތާ 2 މަސް ނުވަނިސް އެ އިސްލާޙް ބާތިލްކުރަން ސަރުކާރުން ނިންމައިފިއެވެ.

މިކަން ހާމަކުރެއްވީ، ޤައުމީ ފަތުރުވެރިކަމުގެ ދުވަހުގެ ޖަލްސާގައި، ފަތުރުވެރިކަމާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ދެއްކެވި ވާހަކަފުޅުގައެވެ. އަމީން ވިދާޅުވީ، ސަރުކާރުން އެނިންމުން ބަދަލު ކުރެއްވީ، ފަތުރުވެރިކަމުގެ ދާއިރާގައި މަސައްކަތް ކުރައްވާ ފަރާތްތަކާއި، ޓްރެވެލް އެޖެންޓުންގެ ކަންބޮޑުވުންތަކާއި ގުޅިގެން އެކަން ކަމާއި މެދު ސަރުކާރުން ވިސްނެވުމަށް ފަހުގައިކަމަށެވެ.

މިކަމާއި ގުޅިގެން އިންޑަސްޓްރީގެ އިސް ފަރާތްތަކުންނާއި އަދި ޓްރެވެލް އެޖެންޓުންގެ ވަރަށް ގިނަ ފަރާތްތަކުން ރައީސުލްޖުމްހޫރިއްޔާގެ އަރިހަށް ކަންބޮޑުވުންތައް ހުށައަޅުއްވާފައި ވުމާއިއެކު މިވަގުތު ރައީސް ނިންމަވާފައި ވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް ކަމުގައިވެސް އަމީން ވިދާޅުވިއެވެ.

ބޭރުގެ ޓުއާ އޮޕަރޭޓަރުން އަތުން ޓެކްސް ނެގުމުގެ އިސްލާހު އުވާލުމަށް ސަރުކާރުން ނިންމަވާފައިވާކަން ހާމަކުރައްވާފައި ވާއިރު، ބައެއް ޓުއަރ އޮޕަރޭޓަރުން ވަނީ، ރާއްޖޭގެ ބުކިންތައް ނެގުން ހުއްޓާލާފައެވެ.

ޤާނޫނަށް އެ އިސްލާޙްތައް ގެނައި އިރުވެސް، ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކުންނާއި، ޓްރެވަލް އެޖެންޓުން ދިޔައީ އެކަމާއި މެދުގައި ކަންބޮޑުވުންތައް ފާޅުކުރަމުންނެވެ.