ޔަމަނުގެ ސަރަހައްދު ތެރެއަށް ވަތް ސަޢޫދީގެ ހަނގުރާމަމަތީ މަތިންދާބޯޓެއް ވައްޓާލައިފި

ޔަމަންގެ މަރީބުއަށް ބޮންއެޅުމުގެ ހަރަކާތްތެރިވަމުން ދިޔަ ސަޢޫދީ ޢަރަބިއްޔާގެ ހަނގުރާމަތީ މަތިންދާ ބޯޓަކަށް، ހަމަލާދީ ވައްޓާލާފައިވާކަމުގައި ޔަމަނުގެ ހޫތީން ބުނެފިއެވެ.

ސަޢޫދީ ޢަރަބިއްޔާއިން އިސްވެ އޮވެ އުފައްދާފައިވާ، ކޯލިޝަނުން އަންނަނީ، ޔަމަނަށް ވައިގެ މަގުން ހަމަލާދެމުންނެވެ. މިގޮތުން އިއްޔެވެސް މަރީބުއަށް ސަޢޫދީގެ ހަނގުރާމަތީ މަތިންދާބޯޓުތަކުން ބޮން އަޅާފައި ވެއެވެ.

ސަޢޫދީގެ އެފް-15 ފައިޓާޖެޓެއް މަރީބު މަތިން ހަމަލާދީ ވައްޓާލާފައިވާކަން އިޢުލާންކޮށްފައި ވަނީ، ހޫތީންގެ ތަރުޖަމާނު ޔަޙްޔާ ސާރީއެވެ. މި ބޯޓު ވައްޓާލާފައި ވަނީ، ޔަމަނުން އުފައްދާފައިވާ، ވައިގެ ދިފާޢީ މިސައިލެއް ބޭނުންކޮށްގެން ކަމަށާއި، އެއީ އަސްކަރީގޮތުން ހޯދުނު ކާމިޔާބެއް ކަމުގައި ހޫތީން ވަނީ ހާމަކޮށްފައެވެ. އެހެން ނަމަވެސް މިކަން ސަޢޫދީން އަދި ކަށަވަރުކޮށެއް ނުދެއެވެ. ޔަމަނުގެ ހޫތީންނަށް ސަޢޫދީގެ ހަނގުރާމަމަތީ މަތިންދާބޯޓެއް ވައްޓާލުމުގައި ކާމިޔާބީ ހޯދިއްޖެނަމަ، އެކަން ވެގެންދާނީ ހަނގުރާމައިގެ އައު މަރުހަލާއެއް ފެށޭނެ ކަމަކަށް ކަމުގައި ދިރާސާކުރާ ފަރާތްތަކުން ބުނެފައި ވެއެވެ.

ޔަމަނަށް ވައިގެ ހަމަލާތައް ދިނުމަށް، ސަޢޫދީ ޢަރަބިއްޔާއިން ބޭނުން ކުރަމުން އަންނަނީ، ޠާއިފާއި، ޚާމީސް އަދި މުޝައިތުގައި ޤާއިމްކޮށްފައިވާ އަސްކަރީ މަރުކަޒުތަކެވެ. ޔަމަނުން ވަނީ އެމަރުކަޒުތަކަށްވެސް ބެލެސްޓިކް މިސައިލުން ހަމަލާތައް ދީފައެވެ.