ފުރަތަމަ ފަހަރަށް ޤައުމީ ފެންވަރުގައި އަތުލިޔުމުގެ ޤައުމީ މުބާރާތެއް ބާއްވަނީ

ޤައުމީ ފެންވަރުގައި ތާނަ އަތުލިޔުމުގެ މުބާރާތެއް ބޭއްވުމަށް ނިންމައި، ދިވެހިބަހުގެ އެކަޑަމީން އެ މުބާރާތުގައި ބައިވެރިވާން ބޭނުންވާ ފަރާތްތަކަށް ފުރުޞަތު ހުޅުވާލައިފިއެވެ.

ދިވެހިބަހުގެ އެކަޑަމީން ފާހަގަކުރައްވާފައިވާ ގޮތުގައި، މީގެ ކުރިންވެސް އަތުލިޔުމުގެ މުބާރާތްތައް ޚާއްޞަ މުނާޞަބަތުތަކުގައި ބާއްވާފައި ވީނަމަވެސް މިއީ، ޤައުމީ ފެންވަރުގައި ތާނަ އަތުލިޔުމުގެ މުބާރާތެއް ބާއްވާ ފުރަތަމަ ފަހަރެވެ. މިގޮތުން މިއަހަރުން ފެށިގެން މި މުބާރާތް ކުރިޔަށް ގެންދާނީ، ޢަލީ ފަހުމީގެ ވާދައިގެ ތައްޓަށް ބާއްވާ އަތުލިޔުމުގެ ޤައުމީ މުބާރާތުގެ ނަމުގައެވެ. ޢަލީ ފަޙްމީއަކީ، އަތުލިޔުން ޚާއްޞަކޮށް ކެލިގްރަފީގައި ރާއްޖޭގައި އުފެދުނު އެންމެ ކުލަދާނަ ފަންނާނެވެ. އޭނާ މަޝްހޫރުވެވަޑައިގެންފައި ވަނީ ތަބައްޢަލިފުޅުފެ ނަމުންނެވެ.

ދިވެހިބަހުގެ އެކަޑަމީން ހާމަކުރައްވާފައިވާ ގޮތުގައި، ޤައުމީ ފެންވަރުގައި ބާއްވާ ފުރަތަމަ އަތުލިޔުމުގެ މުބާރާތް ބާއްވަނީ ދެ ގިންތިއަކަށެވެ. އެއީ އޮފީސްތަކުގެ ބަޔާއި، އަމިއްލަ ފަރާތްތަކުގެ ބައެވެ.

މީގެ އިތުރުން މި މުބާރާތުގައި ބައިވެރިން ވާދަކުރާނީ މައިގަނޑު ތިންވައްތަރެއްގެ ލިޔުން ލިޔުމުގައެވެ. އެއީ؛

1- ރީތިލިޔުން

2- އަވަސް ލިޔުން

3- އަތްތެރިލިޔުން (ކެލިގްރަފީ)

މިމުބާރާތުގައި އޮފީސްތަކުން ބައިވެރިވާއިރު، ކޮންމެ އޮފީހަކުންވެސް، ބައިވެރިކުރެވޭނީ މުބާރާތުގެ މައިގަނޑު ބައިތަކުގެ ތެރެއިން ކޮންމެ ބައެއްގައި ތިން މުވައްޒަފުން ކަމުގައި ދިވެހިބަހުގެ އެކަޑަމީން ހާމަކުރައްވާފައި ވެއެވެ.

އުމުރުން 18 އަހަރު ފުރިފައިވާ ކޮންމެ މީހަކަށްވެސް މިމުބާރާތުަގެ އާއްމުންގެ ބައިގައި ބައިވެރިވެވޭގޮތަށް ހުޅުވާލާފައި ވާއިރު، މުބާރާތުގައި ބައިވެރިވާން ބޭނުންވާ ފަރާތްތަކުން، އަންނަ އޮކްޓޫބަރު މަހުގެ 8 ވަނަ ދުވަހުގެ 13:00ގެ ކުރިން ފޯމު ފުރައި، އެކަޑަމީންދޭ ކަރުދާހުގައި ލިޔެ ފޮނުވަން ޖެހޭނެ ކަމުގައި ދިވެހިބަހުގެ އެކަޑަމީން ވަނީ ހާމަކުރައްވާފައެވެ.

އެކިއެކި މުނާޞަބަތުތަކާއި ގުޅުވައިގެން މީގެ ކުރިން ބާއްވާފައިވާ އަތުލިޔުމުގެ މުބާރާތްތަކަށްވެސް ވަރަށް ބޮޑު ތަރުޙީބެއް ލިބިފައިވާކަން، ދިވެހިބަހުގެ އެކަޑަމީން ފާހަގަކުރައްވާފައި ވެއެވެ.