ރަސްމާލެއިން އީގަލް ހިލްސްއަށް ބިން ދިނުން ހުއްޓުވަން ސްޕްރީމްކޯޓަށް

ޔޫއޭއީގެ ކުންފުންޏެއް ކަމުގައިވާ، އީގަލް ހިލްސްއަށް ރަސްމާލެެއިން 500 ހެކްޓަރުގެ ބިންދޭން ނިންމައި ހަދާފައިވާ އެއްބަސްވުމަކީ، ޤާނޫނު އަސާސީ އާއި ޚިލާފު އެއްބަސްވުމެއްކަން ކަނޑައެޅުމަށް، ސްޕްރީމްކޯޓަށް މައްސަލަ ވައްދައިފިއެވެ.

މި މައްސަލަ ދިވެހިރާއްޖޭގެ ސްޕްރީމްކޯޓަށް ހުށައެޅުއްވީ، ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު، އަދި ޤާނޫނީ ވަކީލު، ޢަލީ ހުސައިންނެވެ. އެމައްސަލަ ޢަލީ ޙުސައިން ސްޕްރީމްކޯޓަށް ހުށައަޅާފައި ވަނީ، އެއްބަސްވުން ޤާނޫނު އަސާސީގެ 250 ވަނަ މާއްދާ އާއި ޚިލާފުވާކަމަށް ވިދާޅުވެއެވެ.

މީގެ އިތުރުން އެ ރަސްމާލެ އީގަލް ހިލްސްއަށް ކުއްޔަށް ދިނުމުގައި 99 އަހަރަށް ލިބޭ ގޮތަށް ހިމަނާފައިވާ ބައިވެސް، ޤާނޫނު އަސާސީގެ 251 ވަނަ މާއްދާގެ (ށ) އާއި ފުށުއަރާކަމަށްވެސް އަލީ ޙުސައިން މައްސަލައިގައި ފާހަގަކުރައްވާފައި ވެއެވެ. އަލީ ޙުސައިންގެ މައްސަލައިގައި އެގޮތަށް ފާހަގަކުރައްވާފައި ވަނީ، 99 އަހަރަށް ކުއްޔަށް ދިންނަމަވެސް، މިލްކުވެރިކަން ބަދަލުކުރާ ކޮންމެ ފަހަރަކު މުއްދަތު، ރީސެޓްވެ، އަލުން 99 އަހަރަށް ގަންނަ ފަރާތަށް ލިބޭގޮތަށް އެއްބަސްވުމުގައި ހިމަނާފައިވާ ކަމަށް، ހާމަވެފައި ވާތީއެވެ.

އީގަލްސް ހިލްސްއަށް ރަސްމާލެ ކުއްޔަށް ދިނުމުގެ އެއްބަސްވުމުގައި ސޮއިކުރީ މިދިޔަ ހަފްތާގެ ހޯމަ ދުވަހުގައެވެ. އެ އެއްބަސްވުން ސަރުކާރުން ސިއްރުކޮށްފައި ވާއިރު، ރަސްމާލެއިން ޔޫއޭއީގެ އީގަލް ހިލްސްއަށް ދީފައި ވަނީ، އެއްވެސް ކުއްޔެއް ނުނަގައި، އަދި ލީސް އިކުއިޒިޝަން ކޮސްޓެއްވެސް ނެގުމެއް ނެތި މުޅިން ހިލޭ ކަމުގައި ސަރުކާރުންވެސް ވަނީ ހާމަކޮށްފައެވެ.

ރަސްމާލޭގެ ބިމަކީ، ދައުލަތުގެ ބަޖެޓުން 800 މިލިއަން ޑޮލަރަށް ވުރެ ގިނަ ފައިސާ ޚަރަދުކޮށް އަދި މުޅިން ހިއްކައިވެސް ނުނިމޭ ތަނަަކަށް ވާއިރު، ސަރުކާރުން މި އެއްބަސްވުން ހެދިކަން ހާމަކުރުމާއި އެކު ފާޑު ކިޔުންތައް ވަނީ އަމާޒުވެފައެވެ.