ސަޢޫދީގެ ފައިޓާ ޖެޓެއް ވައްޓާލިކަމަށް ހޫތީން ބުނާ ބުނުމަކީ ތެދެއްކަމުގައި ބީބީސީން ހާމަކޮށްފި

ސަޢޫދީގެ ހަނގުރާމަތީ މަތިންދާ ބޯޓެއް ވައްޓާލާފައިވާކަމަށް، ޔަމަނުގެ ހޫތީން ބުނެފައިވާ ބުނުމަކީ ތެދެއްކަމުގައި ހޫތީން ހާމަކުރި މައުލޫމާތާއި، ބީބީސީން ކުރި ތަޙްޤީޤުން ސާބިތުވާކަމުގައި ބީބީސީން ރިޕޯޓްކޮށްފިއެވެ.

ހޫތީން ވަނީ، ވައްޓާލި ކަމަށް ބުނި، ސަޢޫދީގެ އެފް-15 ހަނގުރާމަމަތީ މަތިންދާ ބޯޓު ވައްޓާލި ސަރަހައްދުގެ ވީޑިއޯތަކާއި، ބޯޓުގެ ހަލާކުވެފައިވާ ބައިތައް ފެންނަ ފޮޓޯތަކާއި ވީޑިއޯތައް އާއްމުކޮށްފައެވެ. ސަޢޫދީގެ ބޯޓު ވައްޓާލިކަމަށް ބުނެ ހޫތީން ކުރާ ދައުވާގެ ތެދުކަން ކަށަވަރު ކުރުމަށް، ސެޓަލައިޓް ފޮޓޯތަކާއި، ހޫތީން އާއްމުކުރި ފޮޓޯއާއި ވީޑިއޯތައް، އަދި ބޯޓާއި ބެހޭ މައުލޫމާތު އެއްކޮށް ކުރި ދިރާސާތަކަށްފަހު، ބީބީސީން ރިޕޯޓްކޮށްފައި ވަނީ، ހޫތީން ސަޢޫދީގެ ބޯޓެއް ވައްޓާލިކަމަށް ކުރާ ބުނާ ބުނުމަކީ، ތެދެއްކަން ހާމަވާކަމަށެވެ. އެހެން ނަމަވެސް އެކަމާއި ގުޅޭ ގޮތުން ސަޢޫދީ ޢަރަބިއްޔާގެ ރަސްމީ ބަހެއް ލިބިފައި ނުވާކަމުގައި ބީބީސީން ރިޕޯޓްކޮށްފައި ވެއެވެ.

ޔަމަނުގެ ހޫތީންނާއި، ސަޢޫދީ އަރަބިއްޔާއިން ކުރަމުންދާ ހަނގުރާމައިގައި، ސަޢޫދީގެ އެފް-15 މަރުކާގެ މަތިންދާ ބޯޓެއް ހޫތީން ހަމަލާދީ ވައްޓާލުމަކީ، މިހާރު ކުރިޔަށްދާ ހަނގުރާމައިގައި، ހޫތީން ހޯދި ވަރަށް ބޮޑު ކުރިއެރުމެކެވެ. ސަޢޫދީގެ ހަނގުރާމަމަތީ މަތިންދާބޯޓު ހޫތީން އަންގާރަ ދުވަހުގެ ރޭ ވައްޓާލާފައި ވަނީ މަރީބު މަތިންނެވެ. ސަޢޫދީގެ ޑްރޯނެއްވެސް ވައްޓާލާފައިވާކަން ހޫތީން ވަނީ، ބުރާސްފަތި ދުވަހު އިޢުލާނުކޮށްފައެވެ.

ސަޢޫދީގެ އެފް-15 މަތިންދާބޯޓެއް ވައްޓާލުމުގައި ހޫތީން ކާމިޔާބު ހޯދުމަކީ، އަސްކަރީގޮތުން، އީރާނުގެ މަދަދާއި އެހީތެރިކަން ހޯދައިގެން ހޫތީންގެ އަސްކަރީ ބާރު ގަދަކޮށްފައިވާ ކަން އެނގޭ ކަމެއް ކަމުގައި ހުޅަނގުގެ މީޑިއާތަކުގައި ރިޕޯޓްކޮށްފައި ވެއެވެ. މިނިމުނު ހަފްތާގައި، ހޫތީން ވަނީ، ޔަމަނުގައި ހޫތީންނާއި ދެކޮޅަށް ހަނގުރާމަކުރަމުން އަންނަ ސަޢޫދީ ޢަރަބިއްޔާއިން ވާގިވެރިވާ ޔަމަނު ސަރުކާރުގެ އަސްކަރިއްޔާގެ މައްޗަށް ކުރި ހޯދައި ބައެއް ސަރަހައްދުތައް ހޫތީންގެ ބާރުގެ ދަށަށް ގެންގޮސްފައެވެ. މިގޮތުން ބާބު-އަލް މަންދަބުގެ ކޮންޓްރޯލް ހޫތީންގެ އަތްދަށަށް ދިޔުމަކީ، އެކަމުގެ ސަބަބުން ސަޢޫދީ ޢަރަބިއްޔާއަށް ބޮޑު ގޮންޖެހުމަކަށް ވަނީ ވެފައެވެ.