މުދާ އުފުލާ ދޯންޏެއް ދިޔަވެ އަޑިޔަށް ދަނިކޮށް، ފުލުހުންގޮސް ދޯންޏާއި މީހުން ސަލާމަތްކޮށްދީފި

މާލެއިން ފުރައިގެން ރ. އަތޮޅު ރިސޯޓަކަށް ދަތުރުކުރަމުންދިޔަ "ސީލައިން 3" ނަމަކަށްކިޔާ ސަޕްލައި ދޯންޏެއް ކާށިދޫ ކަނޑުގައި ދަތުރުކުރަމުން ދަނިކޮށް، ދޯނީގައި ބަރުކޮށްފައި ހުރި ލަކުޑިތަކެއް ހިފެހެއްޓުމަށް އަޅާފައިވާ ބެލްޓު ކަނޑައިގެންގޮސް ދޯނި އަރިއަޅާލައި، ދިޔަވާ ކަމުގެ މައުލޫމާތު ލިބުމާއި ގުޅިގެން ފުލުހުން އެސަރަހައްދަށް ގޮސް ދޯންޏާއި ދޯނީގައި ތިބި 4 މީހުން ސަލާމަތްކޮށްފިއެވެ.

މިހާދިސާގެ މައުލޫމާތު ފުލުހުންނަށް ރިޕޯޓްކޮށްފައި ވަނީ،މިއަދު 09:57 އެހައިކަންހާއިރުގައެވެ.

ފުލުހުންގެ އިދާރާއިން ވިދާޅުވީ، ބ. އަތޮޅު ފުލުހުންގެ އެހީތެރިކަމާއެކު އެ ދޯންޏާއި ދޯނީގައި ތިބި މީހުން ރައްކާތެރިކަމާއެކު ބ. އޭދަފުއްޓަށް މިހާރު ވައްދާފައިވާ ކަމަށާއި، ދޯނީގައި ތިބި 4 މީހުންގެ ހާލުވެސް ރަނގަޅު ކަމަށެވެ. މިހާދިސާ ހިންގި އިރު އެދޯނީގައި ތިބީ ދިވެހި 3 ފިރިހެނުންނާއި ބިދޭސީ ފިރިހެނެކެވެ.

ފުލުހުން ވިދާޅުވީ، ދޯނި ސަލާމަތްކުރުމަށްޓަކައި ދޯނީގައި ހުރި ބައެއް މުދާ ވަނީ ކަނޑަށް ދޫކޮށްލާފައި ކަމަށެވެ. އޭގެ ތެރޭގައި ހިމެނެނީ ގިނަ އަދަދެއްގެ ލަކުޑި ފިލާ ކަމުގައި މައުލުމާތު ލިބިފައި ވެއެވެ. އެމުދަލަކީ، ރ. އަތޮޅުގައި ތަރައްޤީކުރަމުން އަންނަ ރިސޯޓަކަށް ގެންދިޔަ މުދަލެވެ.