ރައްކާކޮށްފައި ހުރި ފައިސާ ހުސްވެ ރައީސް ނަޝީދުގެ އަތްމަތި ދަތިވެއްޖެކަން ހާމަކޮށްފި

އަތްމަތި ދަތިވެ ފައިސާ ހޯއްދެވުމަށް، ރައީސް ނަޝީދު އެމަނިކުފާނު ލިޔުއްވާފައިވާ ކުރުވާހަކަ ފޮތެއް ޗާޕުކޮށް ވިއްކެވުމަށް ނިންމަވާފައިވާކަން، އޯޝަން ޕަބްލިޝަރސް އިން ހާމަކޮށްފިއެވެ.

މިކަން ހާމަކޮށްފައި ވަނީ، އެމަނިކުފާނުގެ ޙިއްޞާ އޮންނަ، އޯޝަން ޕަބްލިޝާސް އިން އެފަރާތުގެ ސޯޝަލް މީޑިއާ އެކައުންޓްތަކުގައި ކޮށްފައިވާ ޕޯސްޓްތަކުގައެވެ. އޯޝަން ޕަބްލިޝާސް އިން މިވާހަކަތައް އާއްމުކޮށްފައި ވީ ނަމަވެސް، ރައީސް ނަޝީދު އެމަނިކުފާނުގެ ބޭނުންފުޅު ކުރައްވާ އެއްވެސް ސޯޝަލް މީޑިއާ އެކައުންޓެއްގައި މިފޮތާއި އަދި އެމަނިކުފާނުގެ މާލީ ޙާލަތާއި ގުޅޭ އެއްވެސް ވާހަކަފުޅެއް އަމިއްލަފުޅަށް ލިޔުއްވާފައެއް ނުވެއެވެ.

ރައީސް ނަޝީދު ނެރުއްވާ މިފޮތުގައި ހިމަނާފައި ވަނީ، 80ގެ އަހަރުތަކުގައި އެމަނިކުފާނު ލިޔުއްވާފައިވާ ވާހަަކަތެކެވެ. މިގޮތުން، އެފޮތަށް ނަންދީފައި ވަނީވެސް "ކުރުވާހަކަ-80ގެ ފަހުކޮޅު" ގެ ނަމުންނެވެ.

މިފޮތުގައި ހިމަނުއްވާފައިވާ ވާހަކަތަކުގައި،"ޗާލާ ޒަމާން"، "ޤައުމީ މަޝްރޫޢު"، "ރީތި ހަދިޔާއެއް" އަދި "މޫސަބަރު" ނަމުގައި ލިޔުއްވާފައިވާ ވާހަކަތައް ހިމެނެއެވެ. މި ފޮތުގެ އިޝްތިހާރާއި އެކު ލިޔެފައިވާ ލިޔުމުގައި ފޮތުގެ ވާހަކަތަކުގެ ތަޢާރަފްގެ ބައެއް ވާހަކަތައްވެސް ވަނީ ހިމަނާފައެވެ.

ރައީސް ނަޝީދު މިފޮތް ނެރުއްވަނީ، މާލީގޮތުން ކުރިމަތިވަމުން އަންނަ ދަތިތަކުގެ ސަބަބުން ކަމުގައި ލިޔުއްވާފައި ވާއިރު، އޭގެ ސަބަބުތަކުގެ ގޮތުގައި ފާހަގަކުރައްވާފައި ވަނީ، މިހާރު ހުންނެވި ޗެއާ ޕަރސަންގެ މަޤާމަކީ، މުސާރައެއް ލިބޭ މަޤާމަކަށް ނުވުމާއި، ކުރީގެ ރައީސުންނަށް ލިބޭ ޕެންޝަނުންވެސް ބޮޑު ބައެއް ކަނޑާލާފައި ނުވާއި، ރައްކާކުރައްވާފައިވާ ފައިސާ، ލ އަތޮޅުގައި ގެއެއް އަޅަން ކުރެއްވި މަސައްކަތުގައި ހުސްވެފައިވާތީ ކަމުގައި ވިދާޅުވެފައި ވެއެވެ.

ރައީސް ނަޝީދު ނެރުއްވާ، މިފޮތުގެ ޕްރީއޯޑަރއަށް މިހާރު ވަނީ ހުޅުވާލާފައެވެ. ފޮތެއްގެ ޕްރީ އޯޑަރ އަގަކީ، -/250ރ އެވެ. އެހެން ނަމަވެސް ޕްރީއޯޑަރ ކުރަންޖެހޭ ގޮތެއް އެ އިޝްތިހާރުގައި ހާމަކޮށްފައެއް ނުވެއެވެ.

ރައީސް ނަޝީދަކީ، މީގެ ކުރިންވެސް ފޮތްތައް ޗާޕުކޮށް ނެރުއްވާފައިވާ ބޭފުޅެކެވެ.