ފުލުހުންނަށް ކުރާ ތުހުމަތުތަކަށް ޖަވާބުދީ ބަޔާނެއް ނެރެފި

ފުލުހުންގެ އާއްމުންގެ މުދަލަށް ގެއްލުންދޭ ކަމަށް ތުހުމަތުކޮށް ސޯޝަލް މީޑިއާގައި ދައުރުކުރަމުންދާ ވީޑިއޯއާ ގުޅިގެން ފުލުހުން ބަޔާނެއް ނެރެފިއެވެ.

ފުލުހުންގެ އިދާރާއިން ނެރުނު ބަޔާނުގައި ބުނެފައި ވަނީ، ދައުރުވަމުން އަންނަ ވީޑިއޯގައި ފެންނަ ސައިކަލުތަކަކީ، ޤާނޫނީ އަދި އިދާރީ ގޮތުން އެ އުޅަނދުތައް ނައްތާލުމުގެ އިޖުރާޢަތްތައް ފުރިހަމަކޮށް، ނައްތާލުމަށް ހުއްދަ ދެވިފައިވާ އުޅަނދުތަކެއް ކަމަށެވެ.

ފުލުހުންނަށް ފާޑުކިޔުންތައް އަމާޒުވީ، ފުލުހުންނަށް ވެހިކަލްތައް ބެހެއްޓުމަށް ހުޅުމާލެ ފޭސް 2އިން ދީފައިވާ ސަރަހައްދަށް، ޓްރަކެއްގައި ސައިކަލްތަކެއް ގެންގޮސް ޓްރަކުން އެ ސައިކަލްތައް ބިންމައްޗަށް ވައްޓާލާ މަންޒަރުތައް މީހަކު ވީޑިއޯކޮށް އާއްމު ކުރުމާއި ގުޅިގެންނެވެ.

ފުލުހުން ބުނެފައި ވަނީ ވީޑިއޯއިން ފެންނަ އުޅަނދުތަކަކީ، އެ އުޅަނދުތައް ނައްތާލުމަށްޓަކައި، ތިލަފުއްޓަށް ކުނީގެ ގޮތުގައި ގެންދިޔުމަށް، ހުޅުމާލެ ފޭސް 2އިން ފުލުހުންނަށް އަލަށް ހަމަޖެހުނު ޓޯޔާޑަށް ގެންގޮސް ކުނީގެ ގޮތުގައި އެ އުޅަނދުތައް އެއްތަނަކަށް ޖަމާކުރަމުންދިޔަ މަންޒަރު ފެންނަ ވީޑިއޯއެއް ކަމަށެވެ.

މީގެ ކުރިންވެސް މިފަދަ ވީޑިއޯއެއް އާއްމުވެ ފުލުހުންނަށް ފާޑުކިޔުންތައް އަމާޒުވިއެވެ.