ކޯޓު ހިންގި ތަން ހުރަވީ ސްކޫލުގެ ސެން ކްލާސް ހިންގުމަށް ދޭން މަސައްކަތް ކުރައްވަމުންދާ ކަމުގައި އެޗްޑީސީގެ އެމްޑީ ވިދާޅުވެއްޖެ

ހުޅުމާލޭގައި ކުރިން ސިވިލްކޯޓުގެ ހުޅުމާލެ ޑިވިޜަނާއި، ކްރިމިނަލް ކޯޓު ހިންގިތަން ހުރަވީ ސްކޫލުގައި ކިޔަވަމުން އަންނަ، ޚާއްޞަ އެހީއަށް ބޭނުންވާ ދަރިވަރުންގެ ސެން ކްލާސްތައް ހިންގުމަށް ދިނުމަށް މަސައްކަތް ކުރައްވަމުން އަންނަ ކަމުގައި އެޗްޑީސީގެ މެނޭޖިންގ ޑައިރެކްޓަރ ޢަލީ ޒުހައިރު ވިދާޅުވެއްޖެއެވެ.

އޭނާ މިހެން ވިދާޅުވީ، ޕީއެސްއެމްގެ ޗެނަލްތަކުން ގެނެސްދޭ، އަހާށޭ ބުނާނަން ޕްރޮގްރާމަށް އާއްމުންގެ ފަރާތުން ފޮނުވި ސުވާލުތަކަށް ޖަވާބު ދެއްވަމުންނެވެ.

ޒުހައިރުއާ ސުވާލުކޮށްފައި ވަނީ، ހުރަވީ ސްކޫލަށް އެތަން ދޫނުކޮށްގެން އުޅޭ ސަބަބަކާއި ގުޅޭ ގޮތުންނެވެ.

ޒުހައިރު ވިދާޅުވީ، ހުރަވީ ސްކޫލަށް ބޭނުންވާ ބިންވަނީ ދެވިފައި ކަމަށާއި އެސްކޫލުން ބޭނުންވެގެން އުޅެނީ އިިތުރު ބިމެއް ކަމަށެވެ. އަދި ހުރަވީ ސުކޫލާއި ޖެހިގެން އުތުރަށް އޮތް ބިމަކީ، ވަގުތީ ގޮތުން ޖޭއެސްސީއަށް ހަވާލު ކުރެވިފައިވާ ބިމެއް ކަމަށާއި، އެބިމާއި ގުޅޭ ގޮތުން ޖޭއެސްސީ އާއި މަޝްވަރާ ކުރެވެމުންދާ ކަމުގައި ޒުހައިރު ވިދާޅުވިއެވެ.

"އެބިމަކީ ވަގުތީ ގޮތުން، ޖޭއެސްއޭއަށް ހަވާލުކުރެވިފައިވާ ބިމެއް.، ... ޖޭއެސްސީ އާއި އެކު އަޅުގަނޑުމެން މިދަނީ މަޝްވަރާކުރަމުން އެބޭފުޅުން ބޭނުންކުރައްވާނީ ކޮންގޮތަކަށްތޯ؟ އޭގެ އިތުރުން އެބޭފުޅުންނަށް އިތުރަށް ދޫކުރެވޭނެތޯ؟" ޒުހައިރު ވިދާޅުވިއެވެ.

ޒުހައިރު ވިދާޅުވީ، އެބިން ހުރަވީ ސްކޫލުގެ ބޭނުމަށް ބޭނުން ކުރެވޭނެ ގޮތަކާއި މެދު މަޝްވަރާ ކުރަމުންދާ ކަމަށެވެ.

ހުރަވީ ސްކޫލަކީ، ޚާއްޞަ އެހީއަށް ބޭނުންވާ 200 އަށްވުރެ ގިނަ ކުދިން ކިޔަވަމުން އަންނަ ސްކޫލެކެވެ. އެސްކޫލު އިމާރާތްކޮށްފައިވާ ގޮތުން ގްރައުންޑް ފްލޯގައި އެއްވެސް ކްލާސް ރޫމެއް ނުހުރެއެވެ. އެހެންވެ އެކި އެކި ނުކުޅެދުންތެރިކަން ހުންނަ ކުދިން ސިޑިން އަރުވާބޭލުމާއި، އަދި ބައެއް ކުދިން ލިފްޓަށް އަރަން ބިރުގަންނާތީ އާއެކު ކުދިންނަށް ކިޔަވައިދޭން ގްރައުންޑް ފްލޯގައި ކުލާސް ރޫމްތަކެއް ހެދުމަށް، އެބިން ލިބޭތޯ ހުރަވީ ސްކޫލުން މަސައްކަތް ކުރަމުން އަންނަތާ އަހަރުތަކެއް ވެފައިވާ ކަމަށް ހުރަވީ ސްކޫލުގެ ބެލެނިވެރިން ވަނީ ބުނެފައެވެ.

ހުރަވީ ސްކޫލުގައި ސެން ކްލާސްތައް މަތީ ފްލޯތަކުަގައި ހިންގަން ޖެހުމަކީ، ރައްކާތެރި ކަމަކަށް ނުވާއިރު، ޖޭއެސްސީއަށް އެޗްޑީސީން ވަގުތީ ގޮތުން އެބިން ދީފައިވާ މުއްދަތު ހަމަވުމަށް ފަހުވެސް އެފަރާތުން ވަނީ އެބިން ހިފަހައްޓާފައިކަން ބެލެނިވެރިންގެ ފަރާތުން ފާހަގަކޮށްފައި ވެއެވެ.

ހުރަވީ ސްކޫލާއި ޖެހިގެން އުތުރަށް އޮތް ބިމުގައި ހުރި އިމާރާތުގައި ކޯޓު ހިންގުން ހުއްޓާލާފައި ވަނީ، ޓްރީ ޓޮޕް ހޮސްޕިޓަލުގެ ދެކުނުން، ކުރިން ކޮވިޑް ފެސިލިޓީ ހިންގި އިމާރާތަށް، ކޯޓުތައް ހިންގުން ބަދަލު ކުރުމާއި ގުޅިގެންނެވެ. ހުރަވީ ސްކޫލުގެ ޚާއްޞަ އެހީއަށް ބޭނުންވާ ކުދިންނަށް އެބިން ކޮންމެހެން މުހިއްމުވެފައި ވާއިރު، މުއްދަތު ހަމަވުމަށްފަހުގައިވެސް އެތަން ދޫކޮށްނުލާ މައްސަލައިގައި ބެލެނިވެރިންގެ ފަރާތުން ވަނީ ކަންބޮޑުވުން ފާޅުކޮށްފައެވެ.