ސަޢޫދީގެ ޑްރޯންއެއް މަރީބު މަތިން ވައްޓާލާފައިވާ ކަމަށް ހޫތީން ބުނެފި

ޔަމަނުގެ ހޫތީ ހަނގުރާމަވެރިންގެ ހަމަލާތަކުގައި ސަޢޫދީ އަރަބިއްޔާގެ "ވިންގ ލޫންގ 2" ޑްރޯނެއް މަރީބު މަތިން ދަތުރުކުރަނިކޮށް ހަމަލާދީ ވައްޓާލާފައިވާ ކަމުގައި ޔަމަނުގެ ހޫތީން ބުނެފިއެވެ.

ޔަމަނުގެ ހޫތީންގެ ތަރުޖަމާނު ޔަޙްޔާ ސާރީ ސަޢޫދީ ޢަރަބިއްޔާގެ ޑްރޯން ވައްޓާލާފައިވާ ކަން ޔަޤީންކޮށްދީފައިވާ ކަމުގައި، ޔަމަނުގެ އަލް-މަސީރާ މީޑިއާއިން ރިޕޯޓްކޮށްފައި ވެއެވެ. ޔަހްޔާ ސާރީ ވިދާޅުވެފައިވާ ގޮތުގައި އެޑްރޯނަކީ، ޔަމަނުގެ ސަރަހައްދުތަކަށް ހަމަލާތައް ދިނުމަށްޓަކައި، ސަޢޫދީން އުދުއްސަމުން ދިޔަ ޑްރޯނެކެވެ.

ސައޫދީ ޢަރަބިއްޔާއިން ޔަމަނުގެ ހޫތީންނާއި ދެކޮޅަށް ހަނގުރާމަކުރަމުން އަންނައިރު، އިއްޔެވެސް މިސައިލާއި ޑްރޯންތައް ބޭނުންކޮށްގެން ޔަމަނުގެ ސަޢުދާ ޕްރޮވިންސްގެ ސަރަހައްދުތަކަށް ވަނީ ހަމަލާދީފައެވެ.

ޔަމަނުން ސަޢޫދީގެ ޑްރޯންއެއް ވައްޓާލާފައިވާ ކަމަށް ބުނެފައި ވާއިރު، ސަޢޫދީގެ ފައިޓާ ޖެޓެއް ވައްޓާލިކަމަށްވެސް ހޫތީން ބުނެފައި ވެއެވެ. އެހެން ނަމަވެސް ސަޢޫދީގެ އަސްކަރިއްޔާއިން އެކަން ކަށަވަރުކޮށްދީފައެއް ނުވެއެވެ.

ހޫތީން ސަޢޫދީއަށް ދެމުން އަންނަ ހަމަލާތަކުގައި، ސަޢޫދީގެ ތެޔޮ އުފައްދާ މުހިއްމު އިންފްރާސްޓްރަކްޗަރތައް ހަލާކުކޮށްލުމުގެ އިތުރުން، ބާބު އަލް މަންދަބު ބަންދުކޮށް ސަޢޫދި ޢަރަބިއްޔާގެ ތެޔޮ ރަތްކަނޑުން ބޭރުކުރުމުގެ މަގުތައް ވަނީ ބަންދުކޮށްފައެވެ. މީގެ އިތުރުން އީރާނުން ހޮރްމުޒް ކަނޑުއޮޅި ބަންދުކޮށްފައި އޮތުމުގެ ސަބަބުން ސަޢޫދީ ޢަރަބިއްޔާގެ ތެލުގެ ސިނާޢަތަށް ވަނީ ލޮޅުން އަރާފައެވެ.