އަދަދު ނޫހުން ގެނެސްދިން ޑޮކިއުމެންޓަރީއާ ގުޅޭ އިސްތިއުނާފުގެ ސިއްރު އަޑުއެހުން ކެންސަލްކޮށްފި

އަދަދު ނޫހުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއާއި ގުޅުވައިގެން ގެނެސްދިން ޑޮކިއުމެންޓަރީއާ ގުޅިގެން މިއަދު ބާއްވަން ތާވަލްކޮށްފައިވާ އިސްތިއުނާފުގެ ސިއްރު އަޑުއެހުން ހައި ކޯޓުން ކެންސަލްކޮށްފިއެވެ.

އަދަދު ނޫހުގެ ސީއީއޯ ހުސެއިން ފިޔާޒް މޫސާ އިސްތިއުނާފުކުރި މައްސަލަ ހައިކޯޓުން ތާވަލްކޮށްފައިވަނީ މިއަދު ހެނދުނު 9 ޖަހާއިރަށެވެ. އަދި އަޑުއެހުން ކެންސަލްކޮށްފައިވަނީ އިދާރީ ސަބަބެއް ދިމާވެގެންކަމަށް ކޯޓުން މައުލޫމާތުދެއެވެ.

އަދަދު ނޫހާއި ދެކޮޅަށް ނެރުނު ކޯޓު އަމުރާމެދު ބާ ކައުންސިލުން ކަންބޮޑުވުންފާޅުކޮށް ވަނީ އެ މައްސަލައިގެ ތެރެއަށް ވަދެ ތަދައްހުލުވެފައެވެ.

އަދަދު ނޫހުން ގެނެސްދިން އެ ޑޮކިއުމެންޓްރީއަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެކު ލޯބީގެ ގުޅުމާއިއެކު ނުހަމަގުޅުންތަކެއް ހިންގިކަމަށް ބުނެ އަންހެނަކު ދީފައިވާ އިންޓަވިއުއެއްގެ މައްޗަށް އޭއައި ވީޑިއޯތައް ހިމަނައިގެން ތައްޔާރުކޮށްފައިވާ ޑޮކިއުމެންޓްރީއެކެވެ.

އަދަދު ނޫހުގެ ޑޮކިއުމެންޓްރީގައި އަންހެނަކާއި ހަވާލާދީ ގެނެސްފައިވާ ވާހަކަތަކަކީ، ކަނޑައެޅިގެން ދޮގުވާހަކަތަކެއް ކަމުގައި މީގެކުރިން ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

 އަދި މި މައްސަލައާއި ގުޅިގެން އެ ނޫހުގެ ދެ ނޫސްވެރިން ޖަލަށްލިއެވެ. އެގޮތުން، މުހައްމަދު ޝަހުޒާން 15 ދުވަހަށް ޖަލަށްލާފައިވާއިރު، ކޯޓު އަމުރާ ގުޅޭ ހަބަރު ގެނެސްދިން ނޫސްވެރިޔާ ލީވާން އަލީ ނާސިރު ވަނީ 10 ދުވަހަށް ޖަލަށްލާފައެވެ.

މީގެ އިތުރުން މި މައްސަލައިގައި އެ ނޫހުގެ ސީއީއޯ ހުސެއިން ފިޔާޒް މޫސާއާއި އެޑިޓަރު ހަސަން މުހައްމަދުގެ މައްޗަށް ޕީޖީއިން ވަނީ ގަޛުފުގެ ދައުވާ އުފުލާފައެވެ.

މީގެ އިތުރުން، އަދަދު ނޫހުން ޝާއިޢުކުރި ޑޮކިއުމެންޓަރީ "އައިޝާ" އާއި ގުޅުވައިގެން ފުލުހުން އަދަދު ނޫހުގެ އޮފީހަށްވަދެ ބަލައި ފާސްކޮށް، އެ ނޫހުގެ ކޮމްޕިޓަރުތަކާއި ލެޕްޓޮޕްތަކުގެ ހާޑު ޑިސްކުތައް ވަނީ ތަހުގީގުގެ ބޭނުމަށް ކަމަށް ބުނެ ނަގައިގެން ގެންގޮސްފައެވެ.