ބޯކޮށް ވާރޭވެހި އިންނަމާދޫގެ ގޭގެއަށް ފެން ވަދެ ގެއްލުންތައް ލިބިއްޖެ

ބޯކޮށް ވާރޭ ވެހުމުގެ ސަބަބުން، ރ. އިންނަމާދޫގެ ގޭގެއަށް ފެންވަދެ ގެއްލުންތައް ލިބިއްޖެއެވެ.

މިއަދު މެންދުރު ފަހު 1:30 ހާއިރުން ފެށިގެން އިންނަމާދޫއަށް ވަރަށް ބޯކޮށް ވާރޭ ވެހިފައި ވާއިރު، ރަށުގެ ފުޓުސަލް ދަނޑު އޮންނަ ސަރަހައްދުގައި ވަނީ ދޮޅުފޫޓަށް ވުރެ އުސްކޮށް ފެންބޮޑުވެފައެވެ. ފެންބޮޑުވުމުގެ ސަބަބުން، އެސަރަހައްދުގެ ގިނަ އަދަދެއްގެ ގޭގޭއަށް ވަނީ ފެންވަދެ ގެއްލުންތައް ލިބިފައެވެ. މިގޮތުން 13 ވަރަކަށް ގެއަށް ފެންވަދެފައި ވާއިރު، ދެގެއަކަށް ވަރަށް ބޮޑަށް ވަނީ ފެންވަދެފައެވެ.

މީގެ އިތުރުން ފެންބޮޑުވުމުގެ ސަބަބުން، ގިނައަދަދެއްގެ ގޭގޭގެ ފާޚާނާތައް ބްލޮކްވެފައި ވާއިރު، މަގުމަތީގައި ހުރި ޖަންކްޝަންތަކުންވެސް ދަނީ ނަޖިސް ބޭޭރުވަމުންނެވެ. އަދި ފުޓުސަލް ދަނޑު ހިމެނޭ ސަރަހައްދުގައި ހުރި، ނަރުދަމާ ނިޒާމްގެ ޕަމްޕް ސްޓޭޝަންގެ މައްޗަށްވެސް ފެންގަނޑު ހުރީ އަރާފައެވެ.

އިންނަމާދޫ ކައުންސިލްގެ ރައީސް އިބްރާހީމް ހަލީމް ވިދާޅުވީ، އިންނަމާދޫގައި ފެންބޮޑުވެފައިވާ ސަރަހައްދަކީ، މޫސުމީ ވިއްސާރައިގައި އަބަދުވެސް ފެންބޮޑުވުމުގެ މައްސަލަ ދިމާވާ ސަރަހައްދެއް ކަމަށާއި، އެސަރަހައްދުގައި 50 ވުރެ ގިނަ ގެ ހުންނަކަމަށެވެ. އަދި އެމައްސަލައަށް ދާއިމީ ހައްލެއް ހޯދަންޖެހޭކަން ކައުންސިލްގެ ރައީސް ފާހަގަކުރެއްވިއެވެ.

އިންނަމާދޫއަށް ބޯކޮށް ވާރޭވެހި ފެންބޮޑުވުމާއި ގުޅިގެން ރަށުން ފެން ހިންދުމަށް، ކައުންސިލާއި ފުލުހުންނާއި، އެރަށުގައި މިހާރު ހިންގަމުން އަންނަ މަޝްރޫޢުތަކުގެ މަސައްކަތް ކުރަމުން އަންނަ އެމްޓީސީސީގެ މުވައްޒަފުންނާއި، ރައްޔިތުން ގުޅިގެން ދަނީ މަސައްކަތްކުރަމުންނެވެ.

މިގޮތުން ފެން ބޮޑުވެފައިވާ ސަރަހައްދުތަކުން ކޯރު ކަނޑައި ފެންގަނޑު ހިންދުމުގެ މަސައްކަތް މިހާރު ދަނީ ކުރަމުންނެވެ.

ޚަބަރުލިޔުނީ: ޙަސަން ސާތިޢު - ރަށު ރިޕޯޓަރ