ތުޅާދޫ ކައުންސިލްގެ 2 ވަނަ ފުޓްބޯޅަ މުބާރާތުގެ ޗެމްޕިއަން ޓީމަކީ ތޮޅިހެލޭ

ތުޅާދޫ ކައުންސިލްގެ 2 ވަނަ ފުޓްބޯޅަ މުބާރާތުގެ ޗެމްޕިއަންކަން ކްލަބް ތޮޅިހެލޭއިން ހޯދައިފިއެވެ.

ކުލަބު ތޮޅިހެލޭއިން މުބާރާތުގެ ޗެންޕިއަންކަން ހޯދީ އިއްޔެ ހަވީރު ކުޅުނު ފައިނަލް މެޗުގައި އެފްސީ ބިއްލޫރިއާއި ވާދަކޮށް 0-2 ގެ ނަތީޖާއަކުންނެވެ.

ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފު ނިމުނީ އެއްވެސް ޓީމަކަށް ގޯލެއް ނުޖެހިއެވެ.

ދެވަނަ ހާފުގައި ގިނަ ހަމަލާތަކެއް އުފައްދާ ކުލަބު ތޮޅިހެލޭއިން އެޓީމުގެ އަޙްމަދު ޝުހެއިލް(ޝުއްކޮ) ފުރަތަމަ ގޯލްޖަހާ ލީޑްނެގިއެވެ. އެޓީމަށް ދެވަނަ ގޯލް ޖަހާ ލީޑްފުޅާކުރީ އިޝާން އިބްރާހިމް(ސައްޓު)އެވެ. ތޮޅިހެލޭގެ ގިނަ ހަމަލާތަކެއް ޝަމްވީލް މުޙައްމަދު(ބޮންޑާ) އަދި ގޯލް ކީޕަރ އަޙްމަދު ޝަހީމް ދިފާޢުކުރިއެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކުލަބު ތޮޅިހެލޭގެ ޖޯޒީ ނަމްބަރު 23 އިޝާން އިިބްރާހިމް(ސައްޓު)އެވެ. މުބާރާތުގެ އެންމެ މޮޅު ގޯލް ކީޕަރ ކުލަބު ތޮޅިހެލޭގެ ޖޯޒީ ނަމްބަރު 1 އީމާން މޫސާއެވެ. މުބާރާތުގެ އެންމެ ގިނަ ގޯލް ޖެހި ކުޅުންތެރިއަކަށް ހޮވުނީ 7 ގޯލާއިއެކު އެފްސީ ބިއްލޫރީގެ ޖޯޒީ ނަމްބަރު 77 ޢަލީ ވިޝާންއެވެ.

މުބާރާތުގެ އުންމީދީ ކުޅުންތެރިޔަކީ އެފްސީ ބިއްލޫރީގެ ޖޯޒީ ނަމްބަރު 11 މުޙައްމަދު ޒައިދާން ޒައިންއެވެ. މުބާރާތުގެ އެންމެ މޮޅު ކުޅުންތެރިޔަކީ ކުލަބު ތޮޅިހެލޭގެ ޖޯޒީ ނަމްބަރު 19 ހަސަން ޝާމް(ހަސްކާ) އެވެ.

މުބާރާތުގެ ފެއަރ ޕްލޭ ޓީމަކަށް ހޮވުނީ ކަފަމާ ޔުނައިޓެޑެވެ.

ރަނަރއަޕް ޓީމަކަށް އެފްސީ ބިއްލޫރި ހޮވުނު އިރު އެޓީމަށް ވަނީ 25،000 ރުފިޔާ ފައިސާގެ އިނާމް ލިބިފައެވެ.

މުބާރާތުގެ ޗެންޕިއަންކަން ހޯދި ކުލަބު ތޮޅިހެލޭއަށް 40،000 ރުފިޔާ ފައިސާގެ އަދި ޗެންޕިއަން ޝީލްޑްވަނީ ލިބިފައެވެ.

މުބާރާތް ނިންމުމުގެ ރަސްމިއްޔާތުގެ ޝަރަފްވެރި މެހެމާން ތުޅާދޫ ދާއިރާގެ މެންބަރ އަބްދުލް ޙައްނާނު ވިދާޅުވީ ދާއިރާގެ ކައުންސިލުތަކުން ސަރުކާރަށް އެއްބާރުލުން ދެއްވައިފި ނަމަ، ކުރިޔަށް އޮތް 11 މަސް ދުވަސް ތެރޭގައި ސްޕޯޓްސް ކޮމްޕްލެކްސް އެއް ތުޅާދޫ އަދި ގޮއިދޫގައި ޤާއިމްކޮށްދެއްވަން ސަރުކާރުން ނިންމަވާފައިވާ ކަމަށެވެ.

ޚަބަރުލިޔުނީ: ޙަސަން ސާތިޢު - ރަށުރިޕޯޓަރ