ތޮށިގަނޑުމަތީ މަސްބާނަން ހުރި މީހަކު ވެއްޓި ގާތަކުގެ ތެރޭ ތާށިވެފައި ވަނިކޮށް ސަލާމަތްކޮށްފި

މާލޭ ދެކުނު ފަރާތު އުސްފަސްގަނޑާއި ދިމާއި، ބަޖިޔާ ގާތައް މަތީގައި މަސްބާނަން ހުރި މީހަކު ވެއްޓި ގާތަކުގެ ތެރޭގައި ތާށިވެފައި އޮއްވައި ސިފައިން އެމީހާ ސަލާމަތްކޮށްފިއެވެ.

ފުލުހުންގެ އިދާރާއިން ވިދާޅުވީ، މާލެ ސްކޭޓް ޕާކާ ދިމާ ތޮށިގަނޑު، ހިލަގާތަކު ތެރޭގައި މީހަކު ތާށިވެފައި އޮތްކަމުގެ މައުލޫމާތު ފުލުހުންނަށް ރިޕޯޓްކޮށްފައި ވަނީ މިއަދު ހަވީރު 17:16 ހާއިރު ކަމަށެވެ. އަދި މިހާރު އެމީހާ ވަނީ، ސަލާމަތްކޮށްގެން ފަރުވާ ދިނުމަށްޓަކައި، ހޮސްޕިޓަލަށް ގެންގޮސްފައި ކަމުގައި ފުލުހުންގެ އިދާރާއިން ވިދާޅުވިއެވެ.

މިހާދިސާގައި ގާތަކުގެ ތެރޭގައި ތާށިވީމީހާ ސަލާމަތްކޮށްފައި ވަނީ، އެމްއެންޑީއެފްގެ ފަޔަރ އެންޑް ރެސްކިއު ސަރވިސް އިންނެވެ.

ގާތަކުގެ ތެރޭގައި ތާށިވި މީހާއަކީ، އުމުރުން 50 އަހަރުގެ ދިވެހި ފިރިހެނެއްކަމުގައި ފުލުހުންގެ އިދާރާއިން ވަނީ ވިދާޅުވެފައެވެ. މީގެ އިތުރުން އެހާދިސާ ހިނގަން މެދުވެރިވި ސަބަބަކީ ކޮބައިކަން ދެނެގަތުމުގެ މަސައްކަތް ކުރަމުން އަންނަ ކަމުގައިވެސް ފުލުހުންގެ އިދާރާއިން ވިދާޅުވިއެވެ.