ރައީސް ޑރ. މުޢިއްޒާއި ރައީސް ނަޝީދު މިރޭ ރާއްޖެ ވަޑައިގެންނެވީ އެއް ފްލައިޓެއްގައި

ރައީސް ޑރ. މުޢިއްޒާއި ރައީސް ނަޝީދު މިރޭ ރާއްޖެ ވަޑައިގެންނެވީ އެއް ފްލައިޓެއްގައި މައުލޫމާތު އެނގޭ ބައެއް ފަރާތްތަކުން ހާމަކޮށްފިއެވެ.

މިސަރުކާރުން ރަސްމާލޭގެ ދެބައި ކުޅަ އެއްބައި އެއްވެސް ކުއްޔެއް ނެތި ޔޫއޭއީގެ އީގަލް ހިލްސް ނަމަކަށް ކިޔާ ކުންފުންޏަކަށްދޭ މައްސަލަ ހޫނު ވެފައި ވާއިރު، އެކަމަށް ތާއީދު ކުރައްވާކަން ރައީސް ނަޝީދު ވަނީ ހާމަކުރައްވާފައެވެ.

ރައީސް ނަޝީދާއި އެކު ކުރިން އެމްޑީޕީގައި މަސައްކަތް ކުރެއްވި، އަދި ޤައުމީ އެއާލައިންގެ ޑެޕިއުޓީ މެނޭޖިންގ ޑައިރެކްޓަރކަންވެސް ކުރައްވާފައިވާ، އައިޝަތު ޖެނިފަރ މިކަން ސޯޝަލް މީޑިއާގައި ހިއްސާކުރައްވައި، އެއީ އިއްތިފާގެއްތޯ ނުވަތަ ރަސްމާލެ މަޝްރޫޢާ ގުޅޭ ގޮތުން ރާވައިގެން ދެ ރައީސުން ބޭއްވި ފްލައިޓް ބައްދަލުވުމެއްތޯ ވަނީ ސުވާލު އުފައްދަވާފައެވެ.

ކުރީގެ ރައީސް ނަޝީދާއި، މިހާރުގެ ރައީސް ޑރ. މުޙައްމަދު މުޢިއްޒު ރާއްޖެއަށް ވަޑައިގެންފައި ވަނީ، މިރޭ ސިންގަޕޫރުން ރާއްޖެއައި، ސިންގަޕޯރ އެއާލައިންސްގެ ފްލައިޓް އެސްކިއު 438 ގައެވެ. އެފްލައިޓް ވެލާނާ އިންޓަރނޭޝަނަލް އެއާޕޯޓުގައި ޖައްސާފައި ވަނީ، މިރޭގެ 21:53 ގައެވެ.