ވެޓަރަންސް ފުޓްސަލް މުބާރާތް ރަސްމާދޫގައި ކުރިޔަށް ދަނީ

ރަސްމާދޫ ކައުންސިލާއި އާރްޑީއޭ އަދި ރަސްމާދޫ ސްޕޯޓްސް ކުލަބު ގުޅިގެން ރ އަތޮޅަށް ހުޅުވާލައިގެން ކުރިޔަށް ގެންދާ ދެވަނަ ވެޓަރަންސް ފުޓްސަލް މުބާރާތް ރަސްމާދޫގައި ފަށައިފިއެވެ.

މިމަހުގެ 25 ވަނަ ދުވަހު ހަވީރު ފެށި މި މުބާރާތް ހުޅުވުމުގެ ރަސްމިއްޔާތު ބާއްވާފައި ވަނީ އެ ރޭގައެވެ.

އެގާރަ ރަށަކުން ޓީމްތައް ބައިވެރިވި މިމުބާރާތުގައި ތިން ގުރޫޕް ހިމެނޭއިރު، ގުރޫޕް އޭގައި، ރަސްމާދޫ އިން ވަނީ އެޓީމުން ކުޅުނު ފުރަތަމަ ދެމެޗް ކާމިޔާބުކޮށް ކުއަރޓަރ ފައިނަލްގެ ޖާގައެއް ކަށަވަރުކޮށްފައެވެ. ފުރަތަމަ މެޗުގައި އަނގޮޅިތީމާއި ދެކޮޅަށް 0-1 އިން އަދި ރަސްގެތީމާއި ބައްދަލުކުރި މެޗު ފަހަތުން އަރާ 1-2 އިން ރަސްމާދޫ ޓީމު ވަނީ ކާމިޔާބުކޮށްފައެވެ.

ގުރޫޕް އޭގައި ހިމެނޭ ހުޅުދުއްފާރުން ރަސްގެތީމާއި ދެކޮޅަށް ކުޅެ 0-7 ގެ ބޮޑު ތަފާތަކުން ވަނީ މެޗުކާމިޔާބުކޮށްފައެވެ. އެމެޗުގައި ހުސްވި އަހަރުގެ މުބާރާތުގައި ރާ ލެޖެންޑް އަދި ޓޮޕް ސްކޯރަރގެ މަޤާމު ހޯދި އަބްދުލް މަންނާން ވަނީ ހެޓްރިކް ހަދާފައެވެ.

ގުރޫޕް ބީގައި އިނގުރައިދޫ އަދި މަޑުއްވަރީ ބައްދަލުކުރި މެޗު 1-1 އިން ވަނީ އެއްވަރުވެފައެވެ. މިހާތަނަށް މުބާރާތުގައި ފެނިގެންދިޔަ ހަމަ އެކަނި ރަތްކާޑަކީ، އިނގުރައިދޫ ޓީމްގެ ގޯލްކީޕަރ އާޔަތުﷲ ޤާސިމް ދެއްކި ކާޑެވެ.

މި ގުރޫޕްގައި އިންނަމާދޫ އަދި މާކުރަތު ބައްދަލުކުރި މެޗް ކާމިޔާބުކުރީ 0-2 އިން މާކުރަތު ވެޓެރަންސް ޓީމުންނެވެ.

ތިން ޓީމް ހިމެނޭ ގުރޫޕް ސީގެ ފުރަތަމަ މެޗުގައި ދުވާފަރު އަދި މުބާރާތުގައި އަލަށް ވާދަކުރާ އުނގޫފާރުގެ މެޗް ނިމުނީ އެއްވެސް ޓީމަކަށް ގޯލެއް ނުޖެހި އެއްވަރުވެގެންނެވެ.

މިއަދާއި މިރޭ ކުރިޔަށް ހުރި މެޗުތަކަށް ބަލާލާއިރު، މިއަދު ހަވީރު ގުރޫޕް ބީގެ މާކުރަތު އަދި މަޑުއްވަރީ ބައްދަލުކުރާ މެޗު ކުޅޭނެއެވެ.

ގުރޫޕް ސީގައި ހިމެނޭ މީދޫ ޓީމުން އުނގޫފާރާއި ބައްދަލުކުރާ މެޗު މިރޭ 20:20 ކުޅޭނެއެވެ.

މިރޭ ކުޅޭ މުބާރާތުގެ ގުރޫޕް ސްޓޭޖްގެ ނުވަ ވަނަ މެޗުގައި 21:20 ގައި އެންމެ ފަހުގެ ރަނަރއަޕް ހުޅުދުއްފާރު ނިކުންނާނީ އަނގޮޅިތީމާއި ދެކޮޅަށެވެ.

ގުރޫޕް ސްޓޭޖްގެ ފަހު މެޗުތައް 29 ސެޕްޓެމްބަރު ގައި އަދި ކުއަޓަރ ފައިނަލްގެ މެޗުތައް 30 ސެޕްޓެބަރުގައި ކުޅެން ހަމަޖެހިފައި ވާއިރު، ސެމީ ފައިނަލްގެ މެޗުތައް 02 އޮކްޓޯބަރުގައި ކުޅޭނެއެވެ. އަދި މުބާރާތުގެ ފައިނަލް މެޗު ކުޅޭނީ، އޮކްޓޫބަރު 04 ގައެވެ.

ޚަބަރު ލިޔުނީ: ޙަސަން ސާތިޢު - ރަށުރިޕޯޓަރ