އީގަލް ހިލްސްއަށް ސަރުކާރުގެ ހުއްދަ އާއި ނުލައި ރަސްމާލެއިން ތަންތަން ނުވިއްކޭނެކަމަށް ބުނެފި

"މޯލްޑިވްސް ވޯޓަފްރޮންޓް އެންޑް މެރީނާ" މަޝްރޫއުގެ ދަށުން، އީގަލްސް ހިލްސްއިން ތަރައްޤީކުރާ ތަންތަން، ސަރުކާރުގެ ހުއްދައެއް ނެތި ނުވިއްކޭނެ ކަމުގައި، ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

މިނިސްޓަރ މުއްޠަލިބު މިހެން ވިދާޅުވެފައި ވަނީ، އެމަޝްރޫއަށް އަމާޒުވެފައިވާ ފާޑުކިޔުންތަކާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.

މިނިސްޓަރ ޑރ މުއްޠަލިބު ވިދާޅުވީ، ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ ހަމައެކަނި އެފަރާތަކުން ގަންނަ ޕްރޮޕަޓީ ކަމަށާއި، އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް ކަމަށެވެ. އަދި އެ ޕްރޮޕަޓީއެއް ވިއްކާލާނަމަ، ނުވަތަ އެފަރާތެއް މަރުވުމުން ވާރުތަވާނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހުގައި އެކަން ހުއްދަ ކުރާނަމަ ކަމުގައިވެސް މިނިސްޓަރ ވިދާޅުވިއެވެ. އަދި ސަރުކާރުން ހުއްދަ ދޭނަމަ ހުއްދަ ދޭނީ އެކަމަށް ކަޑައެޅިފައިވާ ފީ ނެގުމަށްފަހުގައިކަމަށާއި، އެހެން ކަމުން އޮޓަމެޓިކުން ވާރުތަވާނޭ ކަމަށް ބުނުމަކީ ޙަޤީޤަތާ ޚިލާފުވާހަކައެއް ކަމުގައިވެސް މުއްޠަލިބު ވަނީ ވިދާޅުވެފައެވެ.

ފާޑުކިޔުންތަކަށް ރައްދު ދެއްވަމުން މިނިސްޓަރ މުއްޠަލިބު ވިދާޅުވީ، ރާއްޖޭގައި ހުރި ބޭރު ފަރާތްތަކުގެ ރިސޯޓުތަކާއި ވިޔަފާރިތަކަކީވެސް ވިއްކާ، ބަދަލުކޮށް، ވާރުތަވާ މުދާތަކެއް ކަމަށެވެ. އަދި ރަސްމާލެއިން ޕްރޮޕަޓީއެއް ގަތުމަކީ އެމީހާއާއި ޢާއިލާއަށް އޮޓަމެޓިކުން ވިސާ ލިބޭނެ ކަމެއްވެސް ނޫން ކަމަށާއި، ވިސާ ދިނުމަކީ އިމިގްރޭޝަންގެ ޤާނޫންގެ ދަށުން ބަލަންޖެހޭ ކަންކަން ބެލުމަށްފަހު އެއިދާރާއިން ކުރާކަމެއް ކަމަށާއި، ވިސާ ދޫކުރުމާއި، ކެންސަލްކުރުމުގެ ބާރު އޮންނާނީ އިމިގްރޭޝަންގެ ޤާނުނުގެ ދަށުން އެއިދާރާއަށް ކަމުގައިވެސް މިނިސްޓަރ ޑރ މުއްޠަލިބު ވިދާޅުވިއެވެ.

މިނިސްޓަރ އިތުރަށް ވިދާޅުވީ، ދިވެހި ދައުލަތަކީ ފަޚުރުވެރި މިނިވަން ދައުލަތެއް ކަމަށާއި، ދިވެހި ދައުލަތް ތަނަވަސްވެ ތަރައްޤީ ވަމުން ދިއުމަކީ އިސްތިޤުލާލު ވަރުގަދަވެ، އެހެން ޤައުމުތަކުގެ ނުފޫޒުން ސަލާމަތްވެ އޮތުމަށް މުހިއްމުކަމެއް ކަމަށެވެ. ދިވެހި ދައުލަތް މުއްސަދިވުމަކީ ދިވެހިރާއްޖެއަށް ނުފޫޒު ފޯރުވަން ބޭނުންވާ ފަރާތްތަކުން އެދޭނެ ކަމެއްނޫން ކަމަށާއި، ރާއްޖެއަށް ބޭނުންވަނީ ޖީލުތަކަށް ދެމިގެންދާ ތަރައްޤީގެ އެފަދަ މަޝްރޫއުތައް ކަމަށާއި، ކުރު މުއްދަތުގެ މަންފާއެއް ނޫން ކަމުގައި މިނިސްޓަރ ޑރ. މުއްޠަލިބު އިތުރަށް ވަނީ ވިދާޅުވެފައެވެ.

ރަސްމާލެއިން އީގަލް ހިލްސްއަށް 500 ހެކްޓަރުގެ ބޮޑު ބިމެއް ދެނީ، އެއްވެސް ކުއްޔަކާއި ނުލައެވެ. މިމަޝްރޫޢަކީ، ރާއްޖޭގެ ސިޔާދަތާއި އިސްތިޤުލާލަށް ނުރައްކާވާނޭ މަޝްރޫޢެއް ކަމުގައި އެކަމާއި ދެކޮޅު ހަދާފަރާތްތަކުން އަންނަނީ ފާހަގަކުރަމުންނެވެ.