ބޯކޮށް ވާރޭވެހި އިންނަމާދޫގައި ބޮޑުވި ފެންގަނޑު ހިންދައި ކަރަންޓްގެ މައްސަލަ ހައްލުކޮށްފި

އިއްޔެ ބޯކޮށް ވާރޭވެހި ރ. އިންނަމާދޫގައި ބޮޑުވި ފެންގަނޑު ހިންދައި ރަށުގެ ކަރަންޓަށް ދިމާވި މައްސަލަ ހައްލުކޮށްފިއެވެ.

އިންނަމާދޫ ކައުންސިލުން ވަނީ، ރަށުން ފެންގަނޑު ހިންދުމުގެ މަސައްކަތުގައި އެހީތެރިވި ހުރިހާ ފަރާތްތަކަށްވެސް ޝުކުރު އަދާކޮށްފައެވެ.

އިންނަމާދޫގައި އިއްޔެ ފެންބޮޑުވި ހާދިސާގައި 10 ގެއަކަށް ބޮޑެތި ގެއްލުންތައް ލިބުނެވެ. މީގެ އިތުރުން މަގުމަތީގައި ހުރި ކަރަންޓް ޑިސްޓްރިބިއުޝަން ފޮއްޓަކަށް ފެން އެޅި، އަލިފާން ރޯވުމުގެ ސަބަބުން ރަށުގެ ބައެއް ސަރަހައްދުތަކުން ކަރަންޓްވެސް ކެނޑުނެވެ. އަލިފާން ރޯވި ކަރަންޓްފޮށި ބަދަލުކޮށް އަލުން އެސަރަހައްދުތަކަށް ކަރަންޓްގެ ޚިދުމަތްދޭން ފެށުނީ، ރޭ މެންދަމު 0:10 ހާއިރުން ފެށިގެން ކަމުގައި އިންނަމާދޫ، ފެނަކަ ބްރާންޗް އިން މައުލޫމާތު ދެއްވާފައި ވެއެވެ.

މިހާރު ރާއްޖެއަށް ކުރަމުންދާ ވިއްސާރައިގައި، އުތުރުގެ އަތޮޅުތަކުގެ ބައެއް ރަށްރަށުގައި ފެންބޮޑުވުމުގެ ހާދިސާތައް އަންނަނީ ހިނގަމުންނެވެ. މިގޮތުން ރ އިންނަމާދޫގެ އިތުރުން، ރ. އިނގުރައިދޫ އާއި، މާކުރަތުގައިވެސް ފެންބޮޑުވުމުގެ ހާދިސާތައް ރިޕޯޓްކޮށްފައި ވެއެވެ.