ފަހި ދިރިއުޅުން ފްލެޓް ކުއްޔަށް ދިން މައްސަލައިގައި ޖޫރިމަނާކޮށްފައި ވަނީ 5 ފަރާތެއް

އިޖުތިމާއީ ބޯހިޔާވަހި ކަމުގެ ސްކީމުގެ ތެރެއިން، ލިބިފައިވާ ފްލެޓްތައް ކުއްޔަށް ދޫކޮށްފައިވާ މައްސަލައިގައި، މިހާތަނަށް ޖޫރިމަނާކޮށްފައި ވަނީ 5 ފަރާތެއް ކަމުގައި ފަހިދިރިއުޅުން ކޯޕަރޭޝަނުން ހާމަކޮށްފިއެވެ.

ފަހިދިރިއުޅުން ކޯޕަރޭޝަނުން ހާމަކޮށްފައިވާ ތަފާސް ހިސާބުތަކުގައި ބުނެފައި ވަނީ، ފްލެޓް ކުއްޔަށް ދިން 16 މައްސަލައެއް ބަލަމުން އަންނަ ކަމަށެވެ. އޭގެ ތެރެއިން 5 ފަރާތެއް ޖޫރި މަނާކޮށްފައި ވާއިރު، ފްލެޓް ކުއްޔަށް ދިނުމުގެ 9 މައްސަލައެއް މިހާރުވެސް އަންނަނި ބަލަމުންނެވެ، އޭގެ ތެރެއިން 2 މައްސަލައެއްގައި ފްލެޓްގެ ވެރިފަރާތަަށް ނޯޓިސް ފޮނުވާފައިވާ ކަމުގައިވެސް އެފްޑީސީން ހާމަކޮށްފައި ވެއެވެ.

އެފްޑީސީން ހާމަކޮށްފައިވާ ގޮތުގައި ފްލެޓްތަކަށް ޤަވާއިދުން ކުލި ނުދެއްކުމުގެ މައްސަލަވެސް ބޮޑުވެފައި ވެއެވެ، މިގޮތުން 564 ފްލެޓަކުން ޤަވާއިދުން ކުލި ނުދައްކާކަމުގައި އެފްޑީސީން ވަނީ ފާހަގަކޮށްފައެވެ.

މީގެ އިިތުރުން ހުއްދަ ނެތި ފްލެޓަށް ބަދަލު ގެނައުމުގެ 28 މައްސަލައަކާާއި، ކުނި އެޅުމުގެ 3 މައްސަލައަކާއި އެންގުންތަކަށް ތަބާނުވުމުގެ 2 މައްސަލަ އާއި އެކު ފްލެޓްތަކާއި ގުޅޭ 49 މައްސަލައެއް ބަލަމުން އަންނަކަމުގައި އެފްޑިސީން ވަނީ ފާހަގަކޮށްފައެވެ.