އެމްޑީޕީގެ ރައީސާއި ނައިބު ރައީސްގެ މަޤާމު އުވާލައި ހުރިހާ ބާރެއް ޗެއާޕަރސަންއަށް ދީފި

އިދިކޮޅު އެންމެ ބޮޑު ޕާަޓީ އެމްޑީޕީން ބޭއްވި އެޕާޓީގެ ކޮންގްރެސްގައި ޕާޓީގެ އަސާސީ ޤަވާއިދަށް އިސްލާޙް ގެނެސް ޕާޓީގެ ރައީސާއި ނައިބު ރައީސްގެ މަޤާމު އުވާލައި، ޕާޓީ ހުރިހާ ބާރެއް ޗެއާޕަރސަންއަށް ދީފިއެވެ.

އެމްޑީޕީގެ ކޮންގްރެސް މިފަހަރު ބޭއްވި އިރު، އެޕާޓީގެ ޗެއާޕަރސަންގެ މަޤާމުގައި ހުންނެވީ ކުރީގެ ރައީސް މުޙައްމަދު ނަޝީދެވެ. ރޭ ކޮންގްރެސް ނިންމާލާފައި ވާއިރު އެ ކޮންގްރެސްގައި ޕާޓީގެ އަސާސީ ޤަވާއިދަށާއި، ޤައުމީ މަޖިލިސް އެކުލެވިގެންވާ ގޮތަށް ވަނީ ބޮޑެތި ބަދަލުތަކެއް ގެނެސްފައެވެ. އެމްޑީޕީގެ އަސާސީ ޤަވާއިދުގައިވާ ގޮތުގެ މަތިން ޕާޓީ ހިންގުމުގެ އެންމެ އިސް ގުނަވަނަކީ ޤައުމީ މަޖިލީހެވެ.

އިސްލާޙް ކުރި، އާ ގަވާއިދުގެ ދަށުން ގައުމީ މަޖިލީހުގައި ހިމެނޭނީ، އެމްޑީޕީގެ ސަރުކާރެއްގައި، ވެރިކަމުގެ ދައުރުގައި، ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބާއި، ވަޒީރުންގެ މަޖިލީހަށް ޢައްޔަނުކުރައްވާ އެމްޑީޕީގެ މެމްބަރުންނާއި، ޕާޓީގެ މެމްބަރުކަމުގައި ތިއްބެވި ރައްޔިތުންގެ މަޖިލީހުގެ މެމްބަރުންނާއި، ޕާޓީގެ މެމްބަރުންގެ ގޮތުގައި ތިއްބެވި ސިޓީތަކުގެ މޭޔަރުންނާއި، ޗެއާޕާސަން އާއި ޗެއާޕާސަންގެ ނައިބުންގެ އިތުރުން، އެކި ދާއިރާތަކުން ގައުމީ މަޖިލީހަށް އިންތިހާބުކުރާ މެންބަރުންނެވެ.

އެމްޑީޕީގެ ކޮންގްރެސް ކުރިޔަށް ގެންގޮސްފައި ވަނީ، އޮކްޓޫބަރު 1އިން 3އަށް ސިޓީ ހޯލުގައެވެ.