ތޯއިފް މަތިން ވައްޓާލި ހޫތީންގެ ޑްރޯނެއްގެ ބައިތަކުން ޖެހި އެކަކު މަރުވެ ދެމީހުން ޒަޚަމްވެއްޖެ

ޔަމަނުގެ ހޫތީ ހަނގުރާމަވެރިން، ސަޢޫދީ ޢަރަބިއްޔާގެ ޠާއިފަށް ދިން ޑްރޯން ހަމަލާ ނާކާމިޔާބު ކޮށްލުމުގެ ތެރޭގައި، ޠާއިފުން އެެކަކު މަރުވެ ދެމީހުން ޒަޚަމްވެއްޖެއެވެ.

ހޫތީ ހަނގުރާމަވެރިންގެ ޑްރޯން ޠާއިފް މަތިން ދަތުރުކުރަނިކޮށް އެއަށް ހަމަލާދީ ސަޢޫދީ އަސްކަރިއްޔާއިން ވަނީ ވައިގެ ތެރޭގައި ގޮއްވާލާފައެވެ. އެއާއެކު ބިމައް ވެއްޓުނު ޑްރޯންގެ ބައިތަކާއި އޭގައި ހުރި ގޮވާތަކެތި ވެއްޓުނީ ޠާއިފްގެ އާއްމުންގެ ގެއަކަށެވެ.

ޑްރޯންގެ ބައިތައް ވެއްޓި ގޮވުމުން އެކަކު މަރުވި އިރު، ދެމީހަކު ޒަޚަމްވެފައިވާ ކަމުގައި، ސަޢޫދީގެ މީޑިއާތަކުންވެސް ކަށަވަރުކޮށްދީފައި ވެއެވެ.

ޔަމަނުގެ ހޫތީން ޠާއިފަށް ދޭ ހަމަލާތައް އަމާޒުކޮށްފައި ވަނީ، ޠާއިފްގައި ސަޢޫދީން ޤާއިމްކޮށްފައިވާ އަސްކަރީ މަރުކަޒު ތަކަށެވެ. މީގެ އިތުރުން ޠާއިފްގައި ޤާއިމްކޮށްފައިވާ ސަޢޫދީގެ ތެލުގެ ވަސީލަތްތަކަށްވެސް ހޫތީން ވަނީ ހަމަލާދީފައެވެ.

ހޫތީން ސަޢޫދީ ޢަރަބިއްޔާއަށް ދެމުން އަންނަ ހަމަލާތައް، ޤަޠަރުންނާއި ޢަރަބި އިސްލާމީ ދުނިޔޭގެ އެހެން ޤައުމުތަކުން އަންނަނީ ކުއްވެރިކުރަމުންނެވެ.