ރައީސް ޔާމީނުގެ ޝަރީއަތް އަހަރު ދުވަހަށް ފަހު މިއަދު އަލުން ފަށައިފި

ކުރީގެ ރައީސް ޢަބްދުﷲ ޔާމީނު ޢަބްދުލްޤައްޔޫމުގެ މައްޗަށް ހިންގާ މަނީލޯންޑަރިންނާއި ރިޝްވަތު ހިފުމުގެ ކުށުގެ ދައުވާތަކުގެ ޝަރީޢަތް އަލުން ފަށައިފިއެވެ.

ރައީސް ޔާމީނާއި ދެކޮޅަށް، ކުރިމިނަލް ކޯޓުގައި ދެ ޝަރީޢަތެއް ކުރިޔަށް ދާއިރު، މިއަދު އަޑުއެހުން ފަށާފައި ވަނީ، ވ. އާރަށް ކުއްޔަށް ދިނުމާއި ގުޅޭ ޚިޔާނާތުގެ މައްސަލަތަކުގެ ޝަރީޢަތެވެ. މިގޮތުން ވ. އާރަށް ކުއްޔަށް ދިނުމާއި ގުޅޭ ގޮތުން، ރައީސް ޔާމީނާއި ދެކޮޅު ދައުލަތުން ހުށައަޅާފައި ވަނީ، ރިޝްވަތު ހިއްޕެވުމާއި، މަނީ ލޯންޑަރ ކުރުމުގެ ދައުވާއެވެ. މިދައުވާތައް ކުރިމިނަލް ކޯޓުގައި އަލުން މިފެށީ، ޝަރީއަތް ކުރިޔަށް ނުގެންދާތާ އަހަރެއްގައި ދުވަސް ވުމަށް ފަހުގައެވެ.

އެމައްސަލައިގެ ޝަރީޢަތުގެ އަޑުއެހުންތައް މެދު ކަނޑާލާފައި އޮތީ، ދިވެހިރާއްޖޭގެ ސްޕްރީމްކޯޓުގައި ހިނގަމުން ދިޔަ އިސްތިއުނާފު މައްސަލަ އާއި ގުޅިގެންނެވެ.

މިމައްސަލައިގައި މީގެ ކުރިން ކުރިމިނަލްކޯޓުން، ރައީސް ޔާމީނުގެ މައްޗަށް 11 އަހަރުގެ ޖަލު ޙުކުމެއް އިއްވައި، 5 މިލިއަން ޑޮލަރުން ޖޫރިމަނާކުރިއެވެ. ކްރިމިނަލް ކޯޓުން އެހުކުމް ކުރީ، 25 ޑިސެމްބަރު 2022ގައެވެ. ނަމަވެސް އިސްތިއުނާފު މަރުހަލާގައި، ދިވެހިރާއްޖޭގެ ހައިކޯޓުން ވަނީ، 18 އޭޕްރީލް 2024ގައި، ރައީސް ޔާމީނު އެހުކުމް ބާޠިލްކޮށް އަލުން މައްސަލަ ބެލުމަށް ކުރިމިނަލް ކޯޓުގެ މައްޗަށް އަމުރުކޮށްފައެވެ. އަދި އަލުން އައު ހެކި ހުށަނޭޅޭނެކަމަށްވެސް ކޯޓުން ކަނޑައެޅިއެވެ. އައު ހެކި ހުށަނޭޅޭނެކަމަށް ހައިކޯޓުން ނިންމި ބައި ސްޕްރީމްކޯޓުގައި ދައުލަތުން އިސްތިއުނާފު ކުރުމުން ކުރިޔަށް ގެންދިޔަ މައްސަލަ ބަލައި ނިންމައި، މިދިޔަ ޖުލައި މަހު ސްޕްރީމްކޯޓުންވެސް ހުކުމް ކުރީ އައު ހެކިތައް ބަލައި ނުގަނެވޭނެ ކަމަށެވެ.

ވ. އާރަށުގެ މައްސަލައިގައި ކުރީގެ މެމްބަރު ޔޫސުފް ނަޢީމްގެ މައްޗަށްވެސް ދައުވާކުރިއެވެ.