ރައީސްގެ ދެކަނބަލުން މާލެ ވަޑައިގެންފި

ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވައިލެއްވުމަށްފަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެ މަނިކުފާނުގެ އަނބިކަނބަލުން ސާޖިދާ މުޙައްމަދު މިރޭ ރާއްޖެ ވަޑައިގެންފިއެވެ.

އެ ދެކަނބަލުން ރާއްޖެއަށް ވަޑައިގެންނެވިކަން ހާމަކުރުން ފިޔަވައި އެދަތުރުފުޅާއި ގުޅޭ ގޮތުން، ރައީސުލްޖުމްހޫރިއްޔާގެ އޮފިހުން އިތުރު މައުލޫމާތެއް ހާމަކުރައްވާފައެއް ނުވެއެވެ.

ރައީސުލްޖުމްހޫރިއްޔާގެ ދެކަނބަލުން ނުރަސްމީ ދަތުރުފުޅެއްގައި ސިންގަޕޫރަށް ވަޑައިގެންނެވީ، މިމަހުގެ 27 ވަނަ ދުވަހުގައެވެ.

2025 ވަނަ އަހަރުވެސް ރައީސުލްޖުމްހޫރިއްޔާ 3 ފަހަރު ނުރަސްމީ ދަތުރުފުޅުތަކުގައި ސިންގަޕޫރަށް ވަޑައިގެންނެވިއެވެ. މިއީ އެމަނިކުފާނު، މިއަހަރު، ސިންގަޕޫރަށް ކުރައްވާ ދެވަނަ ދަތުރުފުޅެވެ. އެންމެ ފަހުން އެމަނިކުފާނު ސިންގަޕޫރަށް ނުރަސްމީ ދަތުރުފުޅެއްގައި ވަޑައިގެންނެވީ، މިއަހަރުގެ މެއި މަހުގެ 24 ވަނަ ދުވަހުގައެވެ.

ރިޔާސީ މިދައުރުގެ ތެރޭގައި، މިހާތަނަށް ރައީސުލްޖުމްހޫރިއްޔާ، 7 ފަހަރު ސިންގަޕޫރަށް ވަޑައިގެންނެވި އިރު، އޭގެ ތެރޭގައި ހިމެނެނީ ރަސްމީ އެންމެ ދަތުރުފުޅެކެވެ.