މައްކާ އާއި ދިމާއަށް އައި ޑްރޯން ހަމަލާއެއް ހުއްޓުވާފައިވާ ކަމަށް ސަޢޫދީން ބުނެފި

މައްކާ އާއި ދިމާއަށް އައި ޑްރޯން ހަމަލާއެއް އެއަރ ޑިފެންސް ސިސްޓަމްތަކުން ރޭ ހުއްޓުވާފައިވާ ކަމުގައި ސަޢޫދީ ޢަރަބިއްޔާއިން ބުނެފިއެވެ.

ސަޢޫދީ ޢަރަބިއްޔާއިން ބުނެފައި ވަނީ، މައްކާގެ ވައިގެ ސަރަހައްދާއި ގާތަށް އައި ޑްރޯނަކާއި، މަދީނާގެ ވައިގެ ސަރަހައްދަށްވަތް ޑްރޯނެއް އެއަރ ޑިފެންސް ސިސްޓަމްތަކުން ހަމަލާދީ ވައްޓާލާފައިވާކަމަށާއި، އެހަމަލާތައް ދިނީ، ޔަމަނުގެ ހޫތީން ކަމަށެވެ. އަދި އިސްލާމްދީނުގެ މުޤައްދަސް ސިޓީތަކަށް އަމާޒުކޮށްދޭ މިހަމަލާތައް ކުއްވެރިކުރާ ކަމުގައި ސަޢޫދީ ޢަރަބިއްޔާއިން ވަނީ ބުނެފައެވެ.

ހޫތީން މައްކާ އާއި މަދިނާއަށް ވައިގެ ހަމަލާތައް އަމާޒުކޮށްފައިވާ ކަމަށް، ސަޢޫދީ ޢަރަބިއްޔާއިން ބުނެފައި ވާއިރު، އެކަން ހޫތީ ހަނގުރާމަވެރިން ވަނީ ދޮގުކޮށްފައެވެ.

ހޫތީ ހަނގުރާމަވެރިން ސަޢޫދީ ޢަރަބިއްޔާ އާއި ދެކޮޅަށް ދޭ ހަމަލާތައް އަމާޒުކޮށްފައި ވަނީ، އެޤައުމުގެ ތެލުގެ އިންފްރާސްޓްރަކްޗަރއަށެވެ. ސަޢޫދީ އަރަބިއްޔާގެ ތެލުގެ އިންފްރާސްޓްރަކްޗަރގައި ހިމެނޭ، އީސްޓް - ވެސްޓް ޕައިޕްލައިން (ޕެޓްރޯލައިން) އަޅާފައި ވަނީ، ސަޢޫދީ އަރަބިއްޔާގެ އުތުރުން ދެކުނަށް، މަދީނާގެ އިރުން، އަދި މައްކާ އާއި ޠާއިފާއި ޖިއްދާގެ ހުޅަނގުން ރަތްކަނޑުގެ އައްސޭރީގައިވާ ޔަންބު އަށެވެ. މިހޮޅިލައިންއަކީ، ސަޢޫދީއަރަބިއްޔާއިން އެމެރިކާ އާއި ޔޫރަޕަށް ތެޔޮ އެކްސްޕޯޓް ކުރުމަށްޓަަކައި، ހޮރުމޫޒް ކަނޑު އޮޅު ބޭނުންނުކޮށް ތެޔޮ ފޮނުވޭނެ ގޮތް ހެދުމަށްޓަކައި އަޅާފައިވާ ހޮޅިލައިނެކެވެ.