ޟަރޫރީ ތަކެތި އިމްޕޯޓް ކުރުމަށް ބޭނުންވާ ޑޮލަރު އެބަހުރި - ފިނޭންސް

އިންޑިއާ ބޭންކަށް ސަރުކާރުން ދައްކަންޖެހޭ، 50 މިލިއަން ޑޮލަރު މިއަދު ދެއްކި ނަމަވެސް، ރާއްޖެއަށް އަސާސީ ތަކެތި އެތެރެކުރުމަށް ބޭނުންވާ ޑޮލަރަށް ދަތި ނުވާނެ ކަމުގައި ފިނޭންސް މިނިސްޓްރީން ވިދާޅުވެއްޖެއެވެ.

ފިނޭންސް މިނިސްޓްރީން ނެރުނު ނޫސްބަޔާނުގައި ވިދާޅުވީ، ހުސްވި މަހުގެ ނިޔަލަށް ރާއްޖޭގެ ރަސްމީ ރިޒާވްގައި 644 މިލިއަން ޑޮލަރު ހުރި ކަމަށެވެ. އަދި ހަމައެއާއެކު، ތެލާއި ކާބޯތަކެތީގެ ބާވަތްތަކާއި، އަދި ބޭސްފަރުވާއަށް ބޭނުންވާ ސާމާނުފަދަ ޟަރޫރީ ތަކެތި އިމްޕޯޓް ކުރުމަށް ބޭނުންވާ ބޭރު ފައިސާ މެދު ނުކެނޑި ލިބޭނެ އިންތިޒާމްތައްވެސް ސަރުކާރުން ވަނީ ހަމަޖައްސާފައި ކަމުގައި ފިނޭންސް މިނިސްޓްރީން ވަނީ ވިދާޅުވެފައެވެ.

އަދި މިދަރަނި ދެއްކުމާއި ގުޅިގެން އަސާސީ މުދާ އެތެރެކުރުމަށް ދަތިތަކެއް ކުރިމަތިވެދާނެ ކަމަށް ބުނެ ބައެއް ފަރާތްތަކުން ފަތުރަމުންދާ ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމުގައި ފިނޭންސް މިނިސްޓްރީން ވިނީ ވިދާޅުވެފައެވެ.

ފިނޭންސް މިނިސްޓްރީން ވިދާޅުވީ، ރާއްޖޭގެ އިޤުތިޞާދު ހަރުދަނާކިރުމަށާއި ބޭރުފައިސާގެ ރިޒާވް އިތުރަށް ހަރުދަނާ ކުރުމާއި، ދުނިޔޭގެ މާލީ އިދާރާތަކާއި، ރާއްޖެއަށް އެހީދޭ އެކި ޤައުމުތަކާއި އެކު ފާއިތުވި ދުވަސްތަކުގައި މުހިއްމު މަޝްވަރާތަކެއްވެސް ކޮށްފައި ވާކަމަށެވެ.