ހެންވޭރު ދަނޑުގައި ޖެހި ޓެންޓު ތެރޭގައި ވޯޓުލާން ނުތިބެވޭ ވަރަށް ހިރަފުސް ބޯވެފައި

މިއަދު ކުރިޔަށްދާ ލޯކަލް ކައުންސިލްތަކުގެ އިންތިޚާބާއި ޚިޔާލު ހޯދުމުގެ ވޯޓުގައި އަތޮޅުތަކުގެ މީހުން ވޯޓުލުމަށް ޖަހާފައިވާ ހެންވޭރު ދަނޑުގައި ޖަހާފައިވާ ޓެންޓުގެ ތެރޭގައި ހިރަފުސް ބޯވުމުގެ ސަބަބުން އާއްމުންގެ ޝަކުވާ ބޮޑުވެއްޖެއެވެ.

އެޓެންޓް ޖަހާފައި ހުރީ، ދަނޑުގެ ވިނަގަނޑުމައްޗާއި ބިންމަތީގައި، ސަތަރި، ނުވަތަ ކާޕެޓްފަދަ އެއްވެސް އެއްޗެއް ނާޅައި ކަމަށް ވުމުން، ޓެންޓުގެ އޭސީތައް ޖެއްސުމާއި އެކު އޭސީތަކަށް ދަމާވަޔާއެކު، ތަނުގެ ތެރޭގައި ވަނީ މުޅިން ހިރަފުސް ބޯވެފައެވެ. އެހެންވެ އެޓެންޓުގެ އެކި ދިމަދިމާއިން މިހާރު ހުރީ ހުޅުވާފައެވެ. އެހެން ނަމަވެސް ތަނުގެ ތެރޭގައި އުފެދޭ ހޫނުން ސަލާމަތް ވުމަށް އޭސީތައް ކަނޑާނުލައި ހުރި އިރު ހިރަފުސް ބޯވުމުން އާއްމުންނަށް ވަނީ އުނދަގޫތަކާއި ކުރިމަތިވެފައެވެ.

ހެންވޭރު ދަނޑުގައި އަތޮޅުތަކުގެ 30 ވޯޓު ފޮއްޓެއް ބަހައްޓާފައި ވެއެވެ.

ވޯޓުލާ މަރުކަޒުތައް ޤާއިމްކުރުމަށް ހެންވޭރު ދަނޑުގައި ޓެންޓު ޖަހާފައި ވަނީ، އޮފިޝަލް އިވެޓްސް މޯލްޑިވްސްއަށް 4.9 މިލިޔަން ރުފިޔާ ދީގެންނެވެ.