ދެ ހަފްތާތެރޭގައި އިންނަމާދޫ ސްކޫލަށް ބަޔޮލޮޖީ ޓީޗަރަކު ފޮނުވޭނެ ކަމުގައި އެޑިޔުކޭޝަން މިނިސްޓްރީން ވިދާޅުވެއްޖެ

ދެ ހަފްތާތެރޭގައި އިންނަމާދޫ ސްކޫލަށް ބަޔޮލޮޖީ ޓީޗަރަކު ފޮނުވޭނެ ކަމުގައި އެޑިޔުކޭޝަން މިނިސްޓްރީން ވިދާޅުވެއްޖެއެވެ.

މިޑް ޓަރމް ބްރޭކް ނިމި އަންނަ އާދިއްތަ ދުވަހު ސްކޫލުތަށް ހުޅުވެން ތައްޔާރުވެފައި ވާއިރު، މީގެ ކުރިން އެޑިޔުކޭޝަން މިނިސްޓްރީއިން ވަނީ މިސެޕްޓެމްބަރު މަހު ކުރީކޮޅު އިންނަމާދޫ ސްކޫލަށް ބަޔޮލޮޖީ ޓީޗަރަކު ލިބޭނެ ކަމަށް ވިދާޅުވެފައެވެ.

ރައްޔިތުންގެ ނޫހުގެ ފަރާތުން މިކަމުގެ މައުލޫމާތު ހޯދުމަށް އެޑިޔުކޭޝަނަށް ގުޅުމުން އެމިނިސްޓްރީން ވިދާޅުވީ، އަދި އިންނަމާދޫ ސްކޫލަށް ޓީޗަރަކު ހަމަޖެހިފައިނުވާކަމަށާއި އެހެން ނަމަވެސް 2 ހަފްތާތެރޭގައި ހުރިހާކަމެއް ނިމިގެން ރަށަށް ޓީޗަރަކު ފޮނުވޭވަރުވާނެ ކަމަށެވެ.

މީގެ އިތުރުން ސްކޫލް ހުޅުވުމުން ޓީޗަރަކު ލިބެންދެން ހުރިހާ ކުލާހެއް އޮންލައިންކޮށް ނަގަން މިހާރު ހަމަޖައްސާފައިވާނެ ކަމަށް އެޑިއުކޭޝަން މިނިސްޓްރީން ވިދާޅުވިއެވެ.

މީގެ އިތުރުން ކޮންމެ ހަފްތާ ބަންދެއްގައި ރަސްމާދޫ ސްކޫލުގެ ބަޔޮލޮޖީ ޓީޗަރ ގެނެސްގެން ފިޒިކަލް ކުލާސްތައް ނެގުމަށް މިހާރު ވާނީ ހަމަޖައްސާފައިކަމަށް މަޢުލޫމާތުދެއްވާފައި ވެއެވެ.

20 ސެޕްޓެމްބަރުގައި އެސްއެސްސީ އަދި 23 ސެޕްޓެމްބަރުގައި އައިޖީސީއެސްއީ އިމްތިހާނު ފެށޭއިރު، އިންނަމާދޫ ސްކޫލަށް ބަޔޮލޮޖީ ޓީޗަރަކު އަދިވެސް ނުލިބޭތީ ބެލެނިވެރިން ތިބީ ކަންބޮޑުވެފައެވެ.

10 އަހަރުގެ ކިޔެވުމަށްފަހުގައި ދަރިވަރުންނަށް ކުރިމަތިވާ އެންމެ ބޮޑު އިމްތިޙާނަށް ތައްޔާރުވާން މިހާ ކައިރިވެފައި އޮއްވާ ޓީޗަރަކު ނެތިގެން ކުލާސްތަކެއް ގެއްލިގެން ދިޔުމަކީ ބަލައިގަނެވޭނެ ކަމެއް ނޫން ކަމުގައި ބެލެނިވެރިން ދަނީ ބުނަމުންނެވެ.

ޚަބަރު ލިޔުނީ: ޙަސަން ސާތިޢު - ރަށު ރިޕޯޓަރ