ދެ ދިވެހިންނަށް ތޫނު އެއްޗަކުން ހަމަލާދީ ޒަޚަމްކޮށްލުމުގެ ތުހުމަތުގައި ބިދޭސީއަކު ހައްޔަރުކޮށްފި

މިރޭ މާލޭގައި ބިދޭސީއަކު، ދެ ދިވެހިންނަށް ތޫނު އެއްޗަކުން ހަމަލާދީ ޒަޚަމްކޮށްލުމުގެ ތުހުމަތުގައި ފުލުހުންގެ ބެލުމުގެ ދަށަށް ގެންގޮސްފިއެވެ.

މިމާރާމާރީ ހިނގާފައި ވަނީ ގަލޮޅު ދަނޑުގެ އިރުމަތިން އޮންނަ މަހުގައި މިރޭ، 9:00 ހާއިރުގައެވެ.

ފުލުހުން ބައެއް މީޑިއާތަކަށް މައުލޫމާތު ދީފައިވާ ގޮތުގައި މިމާރާމާރީގައި ޒަޚަމްވެފައި ވަނީ، އުމުރުން 48 އަހަރުގެ ދިވެހި ފިރިހެނަކާއި، އުމުރުން 33 އަހަރުގެ ދިވެހި ފިރިހެނެކެވެ. އަނިޔާވި މީހުންގެ ތެރެއިން އެކަކަށް ސެނަހިޔާ ހޮސްޕިޓަލުގައި ފަރުވާދެމުން އަންނައިރު އަނިޔާވި ދެވަނަ މީހާއަށް ފަރުވާދެމުން އަންނަނީ އިންދިރާގާނދީ މެމޯރިއަލް ހޮސްޕިޓަލުގައެވެ.

މިމާރާމާރީ ހިނގަން މެދުވެރިވި ސަބަބެއް ފުލުހުން ހާމައެއް ނުކުރެއެވެ. އެކަމަކު މައްސަލަ ތަޙްޤީޤުކުރަމުންދާ ކަމުގައި ފުލުހުންގެ އިދާރާއިން ވަނީ ބުނެފައެވެ.