އައްޑޫ ފިޔަވައި ހުރިހާ އަތޮޅަކަށް ވައިޓް އެލާޓް

މިހާރު ރާއްޖެއަށް ކުރަމުން އަންނަ ވިއްސާރަ އާއި ގުޅިގެން ވައިޓް އެލާޓްގެ ސަރަހައްދު ފުޅާކޮށް މިރޭ 23:00 އާއި ހަމައަށް އެލާޓްގެ ވަގުތު ދަންމާލައިފިއެވެ.

މޫސުމާއި ބެހޭ ޤައުމީ އިދާރާއިން މިއަދު އެންމެ ފުރަތަމަ ވައިޓް އެލާޓް ނެރުނީ ކ. އަތޮޅުންފެށީގެން ގދ. އަތޮޅާއި ހަމައަށް މިއަދުގެ 18:00 އާއި ހަމައަށެވެ. އެހެން ނަމަވެސް މިހާރު ވަނީ، ވައިޓް އެލާޓް ހުވަދު އަޮޅުންފެށިގެން ހއ އަތޮޅާއި ދެމެދުގެ ހުރިހާ އަތޮޅަކަށް ފުޅާކޮށްފައެވެ. އަދި މިރޭގެ 23:00 އާއި ހަމައަށް ވައިޓް އެލާޓްގެ ވަގުތު ވަނީ އިތުރުކޮށްފައެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ މިވިއްސާރައިގައި ބޯކޮށް ވާރޭ ވެހުމާއި އެކު ބައެއް ސަރަހައްދުތަކުގައި ފެންބޮޑުވުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވާނެ ކަމުގައިވެސް މޫސުމާއި ބެހޭ ޤައުމީ އިދާރާއިން ވަނީ ލަފާކުރައްވާފައެވެ.

މިހާރު ކުރަމުންދާ ވިއްސާރައިގައި، ރ. އިންނަމާދޫގައި ފެންބޮޑުވެ ބޮޑެތި ގެއްލުންތަކެއް ލިބިފައިވާއިރު، މާލޭގެ މަގުތަކުގައިވެސް ފެންބޮޑުވަމުންދާތީ ސިފައިން ގެންދަނީ ފެން ހިންދުމުގެ މަސައްކަތް ކުރަމުންނެވެ.