އަލިފާނުގެ ހާދިސާގައި ލިބުނު ގެއްލުންތައް މަރާމާތުކޮށް ނިންމަން ހަފްތާއެއް ހޭދަވާނެ

ހުކުރު ދުވަހުގެ އިރު އޮއްސުނު ވަގުތު ހިޔާގެ 5 ވަނަ ޓަވަރުގައި ހިނގި އަލިފާނުގެ ހާދިސާގައި ލިބުނު ގެއްލުންތައް މަރާމާތުކޮށް ނިންމުމަށް ހަފްތާއެއްހައި ދުވަސް ހޭދަވަނާވެ ކަމުގައި އެޗްޑީސީން ބުނެފިއެވެ.

އެޗްޑީސީން އިއްޔެ ހާމަކޮށްފައިވާ ގޮތުގައި އަލިފާނުގެ ހާދިސާ އާއި ގުޅިގެން ހިޔާގެ 5 ވަނަ ޓަވަރަށް ލިބުނު ގެއްލުންތައް ބަލައި ސާފު ކުރުމުގެ މަސައްކަތް އިއްޔެ ވަނީ ފަށާފައެވެ.

އަލިފާނުގެ ހާދިސާ ހިނގާފައި ވަނީ 5 ވަނަ ޓަވަރުގެ އެތެރޭގައި ފާޚާނާތަކުން ވައި ދައުރުވާގޮތަށް ހަދާފައިވާ ވައިގޮޅީގެ ތެރޭގައެވެ. އަލިފާނުގެ ހާދިސާ ހިނގާފައި ވަނީ އެޓަވަރުގެ 9 ވަނަ ފަންގިފިލާ އާއި 14 ވަނަ ފަންގިފިލާ އާއި ދެމެދުން ވައިގޮޅީގައި ހަރުކޮށްފައިހުރި އޭސީ އައުޓްޑޯރ ޔުނިޓެއްގައި ރޯވެގެން ކަމުގައި ވަނީ ބެލެވިފައެވެ. އެހެން ނަމަވެސް އަލިފާން ރޯވާން ދިމާވި ސީދާ ސަބަބެއް މިހާތަނަށް އެނގިފައެއް ނުވެއެވެ.

ހިޔާގެ 5 ވަނަ ޓަވަރުގައި އަލިފާން ރޯވެ ހިނގި ހާދިސާގައި ބައެއް އެޕާޓްމަންޓްތަކުގެ ފާޚާނާގެ ކުޑަދޮރުތަކާއި، އެ ވައިގޮޅިތެރޭގައި ހުރި ނަރުދަމާ ހޮޅިތައް ވަނީ ހަލާކުވެފައެވެ. އަލިފާނުގެ ހާދިސާ އާައި ގުޅިގެން އެ ޓަވަރުގެ ހުރިހާ ފްލޯއެއްގެ 6 އަދި 7 ވަނަ އެޕާޓްމަންޓްގެ ފާޚާނާތައް ބޭނުމެއް ނުކުރެވެއެވެ.

އަލިފާނުގެ ހާދިސާ އާއި ގުޅިގެން އެޓަވަރުގެ 30 އެޕާޓްމެންޓެއްގައި ދިރިއުޅެމުން އައި 140 މީހަކަށް ވަނީ ވަގުތީ ބޯހިޔާވަހިކަން ފޯރުކޮށްދީފައެވެ.