މާބަނޑު މީހުން ސްކޭން ކުރުމުގެ ޚިދުމަތް ހަނިމާދޫ ޞިއްޙީ މަރުކަޒުގައި ފަށައިފި

ހަނިމާދޫ ސިއްހީ މަރުކަޒުގައި މާބަނޑު މީހުން ސްކޭން ކުރުމުގެ ޚިދުމަތްދޭން އިއްޔެ ފަށައިފިއެވެ.

ހަނިމާދޫ ސިއްހީ މަރުކަޒުން ބުނީ އެ މަރުކަޒުގައި އަލްޓްރާ ސައުންޑު ސްކޭން ޚިދުމަތް ރަސްމީކޮށް ރަސްމީކޮށް ފައްޓަވައިދެއްވީ ހަނިމާދޫ ޑަބްލިއުޑީސީގެ ރައީސާ އަލްފާޟިލާ އައިޝަތު ޢީސާގެ އިތުރުން އެމަރުކަޒުގެ ޚިދުމަތުގައި ފޫޅުމާއެއްގެ ގޮތުގައި ދިގު މުއްދަތަކަށް ޚިދުމަތް ކުރެއްވުމަށްފަހު ޝަރަފުވެރިކަމައިއެކު ޚިދުމަތުން ވަކިވެވަޑައގެން ހުންނެވި އަލްފާޟިލާ މަރިޔަމް މޫސާ ( މަރިޔަމްދައިތަ ) ކަމަށެވެ. މި ޚިދުމަތާއިއެކު ރަށާއި، ކައިރި ރަށްތަކުން ޚިދުމަތް ހޯއްދަވާ އެންމެ ފަރާތްތަކަށް ލުއިފަސޭހަކަން ލިބިގެންދާނެ ކަމުގައި ހަނިމާދޫ ސިއްޙީމަރުކަޒުން ވަނީ ބުނެފައެވެ.

ހަނިމާދޫ ސިއްހީ މަރުކަޒުން ބުނީ ސިއްޙީ ދާއިރާގެ ކުރިއެރުމަށް ސަރުކާރުން ކުރައްވަމުންގެންދަވާ މަސައްކަތުގެ ދަށުން ހަނިމާދޫ ސިއްޙީ މަރުކަޒުގެ ފެންވަރު މަތިކޮށް ރައްޔިތުންނަށް ލުއިފަސޭހަކަން ހޯދައި ދިނުމަށް މިއީ ކުރިޔަށް އެޅުނު މުހިއްމު ފިޔަވަޅެއް ކަމަށެވެ. ހަނިމާދޫ ޞިއްޙީމަރުކަޒަށް 27 އަހަރު ފުރުނު އިރު އެ މަރުކަޒުން ވަނީ ޚިދުމަތުގެ ފެންވަރު ރަނގަޅު ކުރުމުގެ ގޮތުން އަންހެނުންގެ ޚާއްސަ ޑޮކްޓަރަކާއި، އެތެރެހަށީގެ ޚާއްސަ ޑޮކްޓަރެއްގެ އިތުރުން ކުޑަކުދިންގެ ޚާއްސަ ޑޮކްޓަރެއް ޚިދުމަތާއި ސްކޭން ކުރުމުގެ ޚިދުމަތްވެސް ދޭންފަށާފައެވެ. މިހިނގާ އަހަރުގެ ތެރޭގައި އެ މަރުކަޒުން އެކްސްރޭ ޚިދުމަތާއި ޑައެލެސިސް ޚިދުމަތް ދިނުމަށް މިހާރު ދަނީ މަސައްކަތް ކުރެވެމުން ކަމުގައިވެސް ހަނިމާދޫ ޞިއްޙީމަރުކަޒުން ހާމަކޮށްފައި ވެއެވެ. އޭގެ އިތުރުން އައު ހޮސްޕިޓަލް އެޅުމުގެ ޢަމަލީ މަސައްކަތް ވެސް ފެށިގެން ކުރިޔަށްދާކަން އެމަރުކަޒުން ވަނީ ފާހަގަކޮށްފައެވެ.

ހަނިމާދޫ ޞިއްޙީމަރުކަޒުން ވަނީ އެ މަރުކަޒުގެ ޚިދުމަތްތައް ކުރިއެރުވުމަށް ސަރުކާރުން ދެއްވާ އެހީތެރިކަން ފާހަގަކޮށް ރައީސް ޑރ މުހައްމަދު މުއިއްޒުއަށް އަދި ސިއްޙީ ވުޒާރާ ހިންގެވުމުގައި މިއަދާއި ހަމައަށް މަސައްކަތް ކުރައްވާފައިވާ އެންމެހާ ފަރާތްތަކަށް އެމަރުކަޒުން ޝުކުރު އަދާކުރާ ކަމަށެވެ.

ޚަބަރުލިޔުނީ: މުޙައްމަދު މުޢާޒް - ރަށުރިޕޯޓަރ