ގޭސް ފުޅިތަކުގައި ބޭނުން ކުރާ ރެގިއުލޭޓަރުގެ ފެންވަރު ބަލައި ފެންވަރުދަށް އެއްޗެހި މަނާކުރަނީ

ރާއްޖޭގައި ކައްކާ ގޭސްފުޅިތަކުގައި ބޭނުންކުރާ، ރެގިއުލޭޓަރތަކުގައި ފެންވަރުބަލައި ހުއްދަދޭ ތަކެތި ނޫނީ ރާއްޖޭގައި ބޭނުން ނުކުރެވޭ ގޮތް ހެދުމަށް ވިސްނަމުން އަންނަ ކަމުގައި ޑިފެންސް މިނިސްޓަރ ޙަސަން ރަޝީދު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، މާލޭގައި ހިނގަމުން އަންނަ އަލިފާނުގެ ހާދިސާތަކާއި ގުޅިގެން އަހާ ފޯރަމަށް އާންމުންގެ މީހަކު ހުށައެޅި ސުވާލަށް ޖަވާބު ދެއްވަމުންނެވެ.

މިނިސްޓަރ ޙަސަން ރަޝީދު ވިދާޅުވީ، އަލިފާނުގެ ހާދިސާތައް ހިނގުން ވަރަށް ބޮޑަށް އިތުރުވެފައިވާ ކަމަށާއި އެކަމުގެ ސަބަބަކަށް ވެފައި އޮތީ މީހުން ދިރިއުޅެން ޖެހިފައިވާ ގޮތް ކަމަށެވެ. މިގޮތުން މީހުން ތޮއްޖެހިގެން ކުދިކުދި ތަންތަންކޮޅުގައި ދިރިއުޅެން ޖެހިފައި ވުމާއި، އެފަދަ ތަންތަނުގައި ޤަވާއިދާއި ޚިލާފަށް ކަރަންޓްވަޔަރުކޮށްފައި ހުރުންވެސް އެއީ އަލިފާނުގެ ހާދިސާތައް ހިނގުމަށް މެދުވެރިވެފައި ހުރި ސަބަބުތައް ކަމަށެވެ.

މިނިސްޓަރ ހަސަން ރަޝީދު ވިދާޅުވީ، އަލިފާނުގެ ހާދިސާތައް ހިނގުމުގައި، ބަދިގޭގައި ބޭނުންކުރާ ކައްކާގޭސް ފުޅިތަކުގެ ރެގިއުލޭޓަރތަކުގެ މައްސަލައަކީވެސް ފާހަގަކުރެވިފައި ބޮޑު މައްސަލައެއް ކަމަށެވެ.

"ބާޒާރުގައި އެބަހުރޭ ތަފާތު ކޮލިޓީގެ ރެގިއުލޭޓަރު. އެހެންވީމަ މިއީ، އަޅުގަނޑުމެން އެބަ ގަސްތުކުރަން، މިކަމަށް ޙައްލެއް ގެނައުމަށްޓަކައި، މީގެ ސްޓޭންޑަރޑް ބަލާފައި، އަޅުގަނޑުމެން ކަނޑައަޅާ ސްޓޭންޑަޑަކަށްވުރެ ދަށް ސްޓޭންޑަރޑްގެ ރެގިއުލޭޓަރު ބޭނުން ނުކުރެވޭ ގޮތަށް ހަދަން." މިނިސްޓަރ ޙަސަން ރަޝީދު ވިދާޅުވިއެވެ.

މިނިސްޓަރ ޙަސަން ރަޝީދު ވިދާޅުވީ، ގޭސް ވިއްކާ ފަރާތްތަކާއި އެކުވެސް ކުރިޔަށް އޮތް ދުވަސްތަކުގައި މަޝްވަރާ ބައްދަލުވުންތައް ބާއްވަވާނެ ކަމަށާއި، އަދި ގޭސްފުޅިތައް ގެންގުޅުމުގަޔާއި، ގޭގައި ގޭސްފުޅި ބަހައްޓާފައި ހުންނަ ތަންތަނަކީ އެންމެ ރައްކާތެރި، ތަންތަންކަމަށް ހެދުމަށްޓަކައި ކުރަންޖެހޭ ކަންތައްތައްވެސް ކުރައްވާނެ ކަމަށެވެ. އަދި އެކަންކަމުގައި މަޝްވަރާކުރަންޖެހޭ އެންމެހައި ފަރާތްތާއިވެސް މަޝްވަރާ ކުރައްވާނެ ކަމުގައި ޑިފެންސް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، އަލިފާނުގެ ހާދިސާތަކަށް އިޖާބަ ދިނުމުގައިވެސް ވަރަށް ބޮޑެތި ގޮންޖެހުންތައް ކުރިމަތިވާ ކަމަށެވެ. އެގޮތުން ފަޔަހައިޑްރަންޓް ޤާއިމް ކުރެވިފައިވާ މަގުތަކުގައިވެސް، ބޭނުން ޖެހޭއިރު، އެ ބޭނުން ނުކުރެވުމާއި، ނުވަތަ ޕާކުކޮށްފައި ހުންނަ ވެހިކަލްތަކުގެ ސަބަބުން އެކްސެސް ނުލިބުން އެއީ އޮތް ގޮންޖެހުމެއް ކަމަށެވެ.

އެހެންނަމަވެސް މާލޭގެ މަގުތައް ހެދުމަށް ޗައިނާ ސަރުކާރުގެ އެހީގައި ހިންގާ މަޝްރޫޢު ނިމޭއިރު އެކަމަށްވެސް ހައްލު ލިބިގެންދާނެ ކަމުގައި މިނިސްޓަރ ވިދާޅުވިއެވެ.