ޗައިނާގެ ފަތުރުވެރިއަކު އޮޔާސް ގޮސް ކަނޑުމަތީގައި އޮއްވައި ފެނުނީ ފުލުހުންނަށް

ކ. އަތޮޅު ރިސޯޓަކުން ސްނޯކްލިންގަށް ގޮސް އުޅުމުގެ ތެރޭގައި އޮޔާދިޔަ ޗައިނާ ގެ ފަތުރުވެރިއަކު ފުލުހުންނަށް ކަނޑުމަތިން ފެނިގެން ސަލާމަތްކޮށްފިއެވެ.

އެމީހާ ގެއްލިގެން އެއްވެސް ރިޕޯޓެއް ކޮށްފައި ނުވަނީސް، އެމީހާ ފުލުހުންނަށް ފެނުނީ، ފުލުހުންގެ ލޯންޗެއް މާލެއިން ފުރައިގެން ދ. ވާނީއަށް ދަތުރުކުރަމުން ދަނިކޮށެވެ.

ފުލުުހުންގެ އިދާރާއިން ވިދާޅުވީ، ، މާލެއިން ދ. ވާނީއަށް ދަތުރުކުރަމުންދިޔަ ފުލުހުންގެ "ލޯންޗް 54" އަށް އެމީހާ ކަނޑުމަތިން އޮޔާދަނިކޮށް ފެނުނީ، ބުދަ ދުވަހުގެ މެންދުރު ފަހު 14:26 ހާއިރުގައި ކަމަށެވެ. އަދި އެމީހާ ފެނުމާއި އެކު ކަނޑުމަތިން ނަގައި ސަލާމަތްކޮށްގެން އަނބުރާ ރިސޯޓަށް ގެންގޮސްދީފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ. ފުލުހުންގެ އިދާރާއިން ވިދާޅުވީ، ކަނޑުމަތިން އެމީހާ ނެގި އިރު ހާލު ރަނގަޅު ކަމަށެވެ.

ރާއްޖޭގެ ރިސޯޓުތަކުގައި ޗުއްޓީ ހޭދަކުރަން އަންނަ ފަތުރުވެރިން މަރުވުމާއި ގެއްލުމުގެ ހާދިސާތައް އެންމެ ގިނައިން ހިނގަނީ ފީނަން އުޅުމުގެ ތެރޭގައެވެ.