ފުވައްމުލައް ސިޓީއަށް 350 ޓަނުގެ ފެންޕްލާންޓެއް ފޮނުވައިފި

ފުވައްމުލަކުގައި ދެމުން އަންނަ ފެނުގެ ޚިދުމަތް އިތުރަށް ފުޅާކުރުމަށްޓަކައި، އެމްޑަބުލިޔުއެސްސީއިން އެރަށަށް، ދުވާލަކު 350 މެޓްރިކްޓަނުގެ ފެން އުފެއްދޭ ޕްލާންޓެއް ފޮނުވައިފިއެވެ.

އެމްޑަބުލިޔުއެސްސީގެ މެނޭޖިން ޑައިރެކްޓަރ ޙުސައިން ފަޙްމީ ވިދާޅުވީ، މި ފެންޕްލާންޓް މިރޭ ފުވައްމުލަކަށް ބާލާފައިވާ ކަމަށެވެ. އޭނާ ވިދާޅުވީ، މި ފެންޕްލާންޓް އޮޕަރޭޝަނަށް ގެނެވުމާއި އެކު، ފުވައްމުލަކުގައި ފެން އުފެއްދޭ ކެޕޭސިޓީ %90 އިތުރުވެގެންދާނެ ކަމަށެވެ. އަދި މިއާއެކު ފުވައްމުލަކަށް ރައްކާތެރި ސާފު ބޯފެން ޔަޤީންކަމާއި އިތުބާރާއި އެކު ދެމެހެއްޓެނިވި ގޮތެއްގައި ފޯރުކޮށްދެވޭނެ ކަމުގައިވެސް ފަހުމީ ވަނީ ފާހަގަކުރައްވާފައެވެ.

މީގެ އިތުރުން ފަހުމީ ވިދާޅުވީ، އައްޑޫ ސިޓީގެ ހުޅުދޫ އާއި މީދޫ ހިމެނޭ ގޮތުން އައްޑު އަތޮޅުގެ ހުރިހާ ރަށަކާއި، ފުވައްމުލައް ސިޓީގެ ފެނުގެ ނިޒާމް ހިންގައި ބެލެހެއްޓުމާއި، އެމްޑަބުލިޔުއެސްސީއިން ހަވާލުވެފައި ވަނީ، މިމަހުގެ 1 ވަނަ ދުވަހުން ފެށިގެން ކަމަށެވެ.