ރައީސުލްޖުމްހޫރިއްޔާގެ ދެކަނބަލުން ސިންގަޕޫރަށް ވަޑައިގެންފި

ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ރޭ ސިންގަޕޫރަށް ވަޑައިގެންފިއެވެ.

މިއީ ނުރަސްމީ ދަތުރުފުޅަކަށްވާތީ، ރައީސްގެ ދެކަނބަލުންގެ މިދަތުރުފުޅާއި ގުޅޭ އިތުރު މައުލޫމާތެއް ރައީސުލްޖުމްހޫރިއްޔާގެ އޮފީހުން ހާމަކުރައްވާފައެއް ނުވެއެވެ.

2025 ވަނަ އަހަރުވެސް ރައީސުލްޖުމްހޫރިއްޔާ 3 ފަހަރު ނުރަސްމީ ދަތުރުފުޅުތަކުގައި ސިންގަޕޫރަށް ވަޑައިގެންނެވިއެވެ. މިއީ އެމަނިކުފާނު، މިއަހަރު، ސިންގަޕޫރަށް ކުރައްވާ ދެވަނަ ދަތުރުފުޅެވެ. އެންމެ ފަހުން އެމަނިކުފާނު ސިންގަޕޫރަށް ނުރަސްމީ ދަތުރުފުޅެއްގައި ވަޑައިގެންނެވީ، މިއަހަރުގެ މެއި މަހުގެ 24 ވަނަ ދުވަހުގައެވެ.

ރިޔާސީ މިދައުރުގެ ތެރޭގައި، މިހާތަނަށް ރައީސުލްޖުމްހޫރިއްޔާ، 7 ފަހަރު ސިންގަޕޫރަށް ވަޑައިގެންނެވި އިރު، އޭގެ ތެރޭގައި ހިމެނެނީ ރަސްމީ އެންމެ ދަތުރުފުޅެކެވެ.