ޤަވާއިދާއި ޚިލާފަށް އުޅޭ 20 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި

ހުޅުމާލެ ރަށު މާރުކޭޓު ބަލައި ފާސްކޮށް، ޤަވާއިދާއި ޚިލާފަށް އުޅެމުން ދިޔަ 20 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން އިއްޔެ ހުޅުމާލެ ރަށު މާރުކަޓަށް ވަދެ، 55 ބިދޭސީއަކާއި ސުވާލުކޮށްފައިވާ ކަމަށް އިމިގްރޭޝަނުން ހާމަކޮށްފައިވެއެވެ. އޭގެ ތެރެއިން އިމިގްރޭޝަންގެ ބެލުމުގެ ދަށަށް ގެންދިޔަ 20 މީހުންނަކީ، ޤަވާއިދާއި ޚިލާފަށް ރާއްޖޭގައި އުޅެމުން ދިޔަ މީހުންނެވެ. މި މީހުންގެ ތެރޭގައި ބަނގުލަދޭޝް މީހުންނާއި ނޭޕާލު އަންހެނުންވެސް ހިމެނެއެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން ހޯދައި، އެމީހުން ރާއްޖެއިން ޑީޕޯޓް ކުރުމުގެ މަސައްކަތް ކުރަމުން އަންނަތާ ގިނަ ދުވަސްތަކެއް ވަނީ ވެފައެވެ.